7 صفات نعرف بيهم الأنثى الغير مكتملة الأنوثة
زي م قلت المرة اللي فاتت كل أنثى عندها نوعين من الطاقة، جزء طاقة أنوثة والجزء التاني ذكورة، والأنثى مكتملة الأنوثة بتكون طاقتها الأنثوية أعلى من الذكورية. أتفق العلماء على نسبة وهي إن الأنثى المتزنة بتكون عندها 80% أنوثة و20% ذكورة.
ودلوقتي هنتكلم عن صفات الأنثى الغير مكتملة والأخطاء اللي بتقع فيها
1- مصطلح "strong independent woman" أو "اللي قادرة على التحدي والمواجهة"
المصطلح ده مستحدث وليس من صفاتنا كمسلمات، ربنا عز وجل عززنا وأكرمنا، ف منروحش للهم والضغوطات ونقعد نشتكي ونقول الراجل مش بيقدرني وانا تعبانة، وأنتِ من البداية قررتي تساوي نفسك بيه. وطبيعتنا البيولوجية والنفسية وكل حاجة مختلفة عن الراجل مينفعش أساوي نفسي بحاجة ربنا من بداية الخلق خلقنا مختلفين فيها عن بعض.
2- صعوبة طلب المساعدة
البنت الغير مكتملة الأنوثة عندها دايما مشكلة فى طلب المساعدة، دايما شايفة نفسها لو طلبت مساعدة هتكون بتقلل من نفسها أو هتضغط الطرف الأخر، مع إن طبيعتنا كبنات بنستقبل وطبيعة الذكر بيعطي، يعني أنتِ كده بتساعدي الراجل إنه يمارس طاقته الذكورية السليمة وأنتِ بتمارسي طاقتك الأنثوية السليمة. وصدقيني هيفرق كتير مع الراجل البنت اللي بتحسسه برجولته وإنها محتاجاه والبنت اللي مسترجله ومش محتاجة وجوده فى حياتها.
3- نكران فطرتك كأنثى والتشبه بالرجال
تشبه البنت بالراجل في لبسه وهيئته وطريقته، ده بيعكس عدم ثقتك في نفسك كأنثى، وبيعكس بالتالي طاقتك الذكورية العالية، البنت السوية متقبلة لذاتها بكل أحوالها وبتقدرها وتهتم بيها.
4- الصوت العالي والعنف في المعاملة
بلاش تتصرفي زي الراجل فى طريقته وأسلوبه وخليكي أنثى رقيقة ودلوعة ولكن بحدود، زي إنك تتكلمي بصوت هادي ورقيق وعدم العنف في الكلام أو تقولي ألفاظ خارجه، ده مش من صفات البنت المسلمة ومش من صفات البنت السوية مكتملة لأنوثة.
5- عدم ثقتك في نفسك وشكلك
قولنا فوق إن عدم الثقة بالنفس بيعكس طاقتك الذكورية، والأنثى المكتملة الأنوثة بتكون واثقة في نفسها وبتعرف تقدرها صح مش مستنية حد غيرها يقدرها.
6- عدم الإهتمام بالمظهر الخارجي
الإهتمام بمظهرنا مهم جدا جدا وبيعكس قد إيه البنت بتحب نفسها وبتهتم بيها وتقدرها، والإهتمام مش بالتبرج ولكن إنك تنسقي لبسك وتكويه تغسلي أسنانك وتهتمي بنظافتك الشخصية، كل ده بيعكس طاقتك الأنثوية.
7- عدم تقبل المدح والرد بمبالغة
مش كل ما حد يمدحك تردي تقوليله عيونك الحلوة عشان كده شايفني حلوة، أنتِ أحلى وتأفوري فى رد فعلك، ده بيعكس عدم ثقتك بنفسك، ممكن بكلمة واحدة تعبري بيها عن امتنانك ولكن من غير مبالغة، كلمة "شكرا" كفاية جدا.
المرة الجاية هكلمكم عن صفات الأنوثة المكتملة وازاي ترفعي طاقتك الأنثوية 🩷
منتظرة رأيكم في الكومنتات واسئلتكم اقتراحاتكم تقدروا تبعتوا على صفحتي على الانستجرام rahma.abdelalem.1
متنسوش تتابعونا على السوشيال ميديا بتاعتنا عشان تشوفوا كل جديد 💛🌟
♥️♥️♥️
ردحذفجميل اوي 💕
ردحذف