حبي نفسك
زي المرة اللي فاتت شوفت فيلم بالصدفة عجبتني فكرته جدا وشدتني اتفرج عليه وأكمله لنهايته ، وبعدها حبيت أشاركها معاكوالأنه أثر فيا وشحني بالطاقة الإيجابية، ودا لأنه بيعرض مشكلة بنات كتير جدا بتتعرضلها وبتعاني منها، وهى مشكلة عدم الثقة بالنفس.
الفيلم بيحكي قصة بنت مش بتحب شكلها ولا متقبلة جسمها، ومش واثقة في نفسها خالص ولا في قدراتها، ف بتقرر تلعب رياضة عشان تخسر شوية من وزنها، وتظبط جسمها.
في أول تمرين ليها المدربة قلتلهم كلام يحمسهم ويشجعهم ومن ضمن كلامها انهم يثقوا في نفسهم وانهم يقدروا يتغيروا وإن المكان دا بيعمل معجزات، واقتنعت إن فعلا هتحصلها معجزة بعد م تخلص وحياتها هتتغير وهتخرج من التمرين شخص تاني، مع إن كل كلام المدربة كان تحفيزي بس عشان يكملوا التمرين ويستمروا عليه يشوفوا النتيجة بعد وقت.
البطلة بعد م سمعت الكلام دا كانت بتتمرن بحماس شديد جدا، ومن سرعتها وقوة حركتها مخدتش بالها ف خبطت راسها واغمى عليه، ولما فاقت افتكرت إن حصلها معجزة بجد وشكلها اتغير، اقتنعت إن في سحر حصل خلاها تخس وتبقى أحلى، مع إن دا مش حقيقي وهي الوحيدة اللي كانت شايفة دا، لأن الواقع هو إنها لسة زي ما هي، مفيش سحر ولا حاجة وشكلها متغيرش.
بس عشان هي كانت مصدقة من جواها إن شكلها بقى أحلى ف بقت واثقة من نفسها، وشايفة انها لما خست بقت احلى وبقت تشوف قدراتها وإيجابياتها.
البطلة كانت بتشتغل في مخزن لشركة منتجات تجميل كبيرة، ومكانتش مبسوطة في مكانها دا بس كانت شايفة إن دا اللي تستحقه وإن مفيش مكان تاني هيقبلها، لكن بعد المعجزة اللي حصلت - من وجهة نظرها طبعا- بقت شايفة إنها تقدر تشتغل في مكان أحسن.
وفعلا قدمت فى إعلان وظيفة الإستقبال في الشركة اللي بتشتغل فيها، عملت الانترفيو وهي مقتنعة إنها أكيد هتتقبل عشان هي جميلة وشكلها حلو ولبسها متناسق واثقة من نفسها وعندها خبرة كفاية ومعلومات تخليها تقدر تكون جزء من الشركة. وفعلا اتقبلت، بس مش عشان هي جميلة، بالعكس هي لسة زي م هي، اتقبلت عشان اتكلمت بثقة وحماس وقالتلهم على مهاراتها وهي هتقدر تقدم لهم إيه وتفيدهم ازاي والحاجات اللي ممكن يعدلوا فيها او يضيفوها، وكلامها دا أبهر المديرة وخلاها تقبلها، مش بس كدا لا دا كمان بقت بتاخد رأيها في حاجات كتير.
بقت بتمشي في الشركة زي الفراشة، مرتاحة وواثقة في نفسها، وبتقدر تقدم لهم اقتراحات تفيدهم زي أنهم يهتموا بفئات مختلفة من البنات، وانهم مش لازم انهم يهتموا بالبنات اللي من فئة عالية ويقدموا منتجات غالية، لا يلتفتوا للبنات العادية ويقدموا منتجات مناسبة ليهم، سواء من الأسعار أو سهولة الاستخدام، لأنهم مش خبراء تجميل ف مش كلهم بيعرفوا يستخدموا المنتجات دي لوحدهم صح وهكذا، ودا لانها كانت واحدة منهم وعاشت نفس المشاكل دي.
كمان بقت اجتماعية أكتر وعادي تتعرف على أي حد في أي وقت وأي مكان، وبقت بتخرج وتتبسط وعايشة الحياة اللي كانت وسماها في أحلامها، واللي كانت شايفة إن شكلها يمنعها من إنها تعيشها، وبقت تحضر اجتماعات وتتكلم قدام الناس عادي ، كل دا عشان بقت واثقة في نفسها بس وشايفة إنها حلوة وتستحق إنها تكون ناجحة.
وفي مرة وقعت واتخبطت في دماغها تاني واغمى عليها بنفس الطريقة، ولما فاقت بقى بالنسبة لها إن كدا مفعول السحر راح ورجعت تاني شكلها القديم، مكانتش عايزا حد يشوفها كدا، وسابت شغلها فجأة ومن غير م تقول أسباب، وبعدت عن صاحبها الجداد، لأنها مقتنعة انهم مش هيتقبلوها بشكلها دا، ودخلت في حالة اكتئاب شديدة، وحاولت ترجع لأصحابها القدام ومعرفتش لأنها كانت اهملتهم وزعلتهم منها.
وبعد فترة، ويوم الإعلان عن المجموعة الجديدة اللي هي كانت مشاركة في إنتاجها بالأفكار اللي قدمتها، وكانت هي اللي هتفتح حفلة الإعلان عنها، قررت ترجع تاني الشركة، وتقف تتكلم قدام الناس كلها عشان تحكي اللي حصلها.
وفعلا طلعت وبدأت تحكي قصتها المعجزة اللي حصلت لها، وعرضت صورتين ليها على الشاشة وهي بتتكلم، واحدة قديمة من وقت ما كانت في المخزن وبتحكي عن حياتها زمان، وصورة تانية وهي موظفة إستقبال وبتحكي عن التغيير اللي حصلها.
وفجأة تبص على الصورة ولسة هتكمل كلامها اكتشفت إنها في الصورتين بنفس الشكل ونفس الوزن وشكلها متغيرش، وهنا أدركت إن مكانش في سحر محصلتش معجزة ولا حاجة وإنها عملت كل دا بنفسها من غير م تغير حاجة، وقالت جملة حلوة جدا، قالت: "أنا عملت كل دا لما كنت نفسي".
بعد كدا غيرت الخطاب اللي كانت بتقوله، وبدأت تتكلم عن إننا لازم نحب نفسنا، ونتقبل نفسنا زي م إحنا ونقدرها، وإننا لما بنكون عارفين قدراتنا وواثقين في نفسنا هنقدر نوصل لأهدافنا ونعيش الحياة اللي كان نفسنا نعيشها، هنقدر نستمتع بحياتنا ونعمل كل اللي إحنا عايزينه ونتبسط، وكل دا هيحصل بس لما نبص لنفسنا بطريقة صح ونركز على إيجابياتنا ومميزاتنا ونبرزها ونتصالح مع سلبياتنا وعيوبنا.
كالعادة منتظرة أراكم ومشاركتكم في الكومنتات 💛🌟
#عبثيون #عبثيون_العصر_الحالي #3abthion
🖊️ BMD
متنسوش تتابعونا على السوشيال ميديا بتاعتنا عشان تشوفوا كل جديد 💛🌟
♥️♥️♥️
ردحذف