ملحوقة دايمًا: ازاي تعوض اللي فاتك وتغتنم العشر الأواخر من رمضان؟
المقالة دي ممكن تكون اتأخرت حبة، بس لسه في وقت نلحق فيه كل خير. بيقولوا "أن تصل متأخرًا خير من أن لا تصل أبدًا"، والجملة دي مش بس على المقال، دي كمان رسالة لكل واحد أو واحدة حاسّين إنهم قصّروا شوية في رمضان ومقدروش يلتزموا زي ما كانوا مخططين.
"It's never too late" . مفيش حاجة بيعدي وقتها، وخصوصًا الحاجات اللي بتقربك من ربنا. طول ما يوم القيامة مجاش، فالباب لسه مفتوح، وباب التوبة مش مقفول، قوم وخد أول خطوة، وابدأ من دلوقتي، وكل خطوة ليك ليها أجر كبير.
وطبعًا إحنا كلنا عارفين فضل العشر الأواخر من رمضان، وإن فيهم ليلة القدر، اللي ربنا قال عنها إنها "خير من ألف شهر". ففرصتك لسه موجودة، ويلا نشجع بعض على أهم العبادات اللي نقدر نعملها في الأيام العظيمة دي.
1. الدعاء
من أهم الأعمال في العشر الأواخر. السيدة عائشة رضي الله عنها سألت سيدنا محمد صلى الله عليه وسلم تقول إيه في ليلة القدر، فقال: "اللهم إنك عفو تحب العفو فاعفُ عني." خلي الدعاء ده دايمًا على لسانك، وادعي بكل اللي نفسك فيه، وربنا مش هيخيب ظنك أبدًا.
2. قيام الليل
قال رسول الله صلى الله عليه وسلم: "من قام ليلة القدر إيمانًا واحتسابًا غفر له ما تقدم من ذنبه." حاول تلتزم بصلاة التراويح أو التهجد، ولو صليت مع الإمام لحد ما يخلص، هيتحسبلك قيام ليلة كاملة. حتى لو في البيت، الأجر كبير جدًا. ولو صليت بركعتين قيام فيهم 100 آية، تُكتب من القانتين، فمتفوتش الفرصة.
3. الاعتكاف
سنة نبوية جميلة. معناها إنك تعتزل الدنيا شوية وتبعد عن المشتتات، وتاخد هدنة حقيقية. حتى لو اعتكافك ساعات قليلة، خده بنيّة، وخلي لك ركن في البيت للعبادة، خصوصًا لو كنتِ بنت، تفرغي فيه للدعاء، والقرآن، والصلاة.
4. الصدقة والأذكار
تصدق كل يوم، حتى لو بجنيه. وما تنساش تذكر ربنا طول اليوم، حتى وإنت بتعمل حاجة تانية، خليك دايمًا فاكر الله، ده سر الطمأنينة.
5. الصلاة
أساس كل حاجة. صلّي الفروض في وقتها، وزوّد عليهم النوافل. للرجالة، حاولوا تصلوا في جماعة، الثواب كبير جدًا ومضاعف.
6. قراءة القرآن
اعمل ورد يومي ولو صفحة واحدة، الأهم هو الاستمرار. افهم الآيات، وعيش معانيها، ومتخليش القراءة بس عادة. وسورة الإخلاص 3 مرات = ختمة كاملة، فدي كمان فرصة عظيمة.
7. بر الوالدين وصلة الرحم
اتواصل مع أهلك، اسأل عليهم، واتصالح مع اللي زعلت منه حتى لو متأخر. ولو والدك أو والدتك توفاهم الله، ما تنسهمش من الدعاء.
وأهم نقطة في كل ده:
لو مكنتش ملتزم من أول رمضان، أوعى تيأس. ربنا غفور رحيم، وبيبص لقلبك ومحاولتك، مش لبداية الشهر بس.
جاهد نفسك، لو كسلان اجبرها، الأجر على قد المشقة.
استغل الأيام دي، مفيش ضمان إنك تبقى موجود السنة الجاية.
وخد بالك، متدخلش في دوامة "ليلة القدر إمتى؟"، اجتهد في كل الليالي، وربك هيكافئك، سواء أدركتها ولا لأ.
في الختام، خلّي نيتك صافية، وابذل اللي تقدر عليه، وشجّع غيرك. دي فرصة مش بتتكرر كتير، فاستغلها كويس.
ابدأ دلوقتي، حتى لو خطوة صغيرة. وشارك المقال مع اللي حواليك، يمكن يكون سبب في إن حد تاني يلحق الخير قبل ما يفوت. "وربنا يتقبل منّا ومنكم صالح الأعمال".
تعليقات
إرسال تعليق
متنساش تشاركنا برأيك