بتقولي "البيريود جاتلي"؟! طيب تعالي شوفي إزاي تلحقي أجر العشر الأواخر من غير ما تفوتك الفرصة.
أول حاجة بقى نشيل من دماغنا تمامًا الفكرة الغريبة دي بتاعة: "ربنا مش بيحبني عشان جاتلي البيريود دلوقتي، ومش هقدر أعبد زيهم، وكدا الفرصة راحت مني"
ومش هاخد نفس الثواب، ومش هقدر أبقى ملتزمة بالورد والصلاة والصيام و"الهبل دا كله"…
يا بنتي كبرنا بقى، وعقلنا، ومفروض بقينا فاهمين ومتقبلين الموضوع، ولا إيه يا فوزية؟!
دي حاجة ربنا كتبها علينا، وكلنا بنمر بيها، فـ واجب علينا نتقبلها ونرضى بيها، مش نزعل منها.
وإنتِ لسه عندك فرصة تعملي حاجات كتير جدًا وتغتنمي العشر الأواخر زيك زي أي حد، وده اللي اتكلمنا فيه في المقالة اللي فاتت عن استغلال العشر الأواخر.
فـ تعالى نبدأ...
1. الدعاء مفتوح ليكي طول الوقت
البيريود مش بتمنعك من الدعاء. خلي دعاء "اللهم إنك عفو كريم تحب العفو فأعفُ عني" على لسانك، وادعي بأي حاجة نفسك فيها. ربنا كريم وبيستجيب، بس أنتِ ادعي وخلي عندك يقين.
2. الأذكار في كل لحظة
اذكري ربنا بأي صيغة تحبيها:
- سبحان الله
- الحمد لله
- لا إله إلا الله
- الله أكبر
- لا حول ولا قوة إلا بالله
- وصلي على النبي دايمًا
وكمان متنسيش أذكار الصباح والمساء، وقوليهم بإحساسك، مش مجرد ترديد، واستشعري الكلام اللي بتقوليه.
3. القرآن؟ مفيش مشكلة خالص
صح، مش هينفع تمسكي المصحف، بس إحنا في عصر التكنولوجيا! نزّلي أبلكيشن مصحف أو اسمعي القرآن من الموبايل أو اليوتيوب، وثوابك كامل بإذن الله، بل يمكن أكتر كمان لأنك بتحاولي وبتجتهدي.
4. الصدقة دايمًا مفتوحة
الطهارة مش شرط للصدقة، فلو تقدري تتبرعي بجنيه حتى، اعملي كدا. ربنا بيجازي على النية، وعلى المجهود، مش بس القيمة.
5. الاعتكاف بأسلوبك
خدي نية الاعتكاف، وجهزي لنفسك ركن هادي في البيت.
ابعدي عن السوشيال ميديا، خدي هدنة روحية، اقعدي فيه تقري، تدعي، تسمعي دروس ... هو دا الاعتكاف ... عزلة من الفوضى علشان توصلي للسكينة.
6. اسمعي واتعلمي
اسمعي محاضرات دينية، دروس، بودكاست، أو حتى تابعي السيرة النبوية أو الأحاديث ... اعملي لنفسك جدول صغير في العشر الأواخر، وتعلمي أي حاجة تقربك لربنا، مهما كانت بسيطة.
7. جهادي نفسك وخدي الأجر الضعف
إنتِ فعلًا بتاخدي أجر على تعبك وتحملك أيام البيريود، بس ليه متزوديش ده كمان بعبادات تانية؟ كل حاجة بتعمليها دلوقتي، من دعاء وذِكر وسماع علم، هي جهاد نفس. ومدام بتحاولي، فـ الأجر مضاعف: "إن الله لا يضيع أجر من أحسن عملًا."
بلاش البيريود تبقى حجة، وتقوليلها "هتمنعني أعبد"، لأ، أنتِ أقوى من كدا. ومتنسيش إنك ممكن تخرجي من العشر الأواخر دي أقرب لربنا من أي وقت فات... حتى لو من غير ولا ركعة.
ربنا بيبص لقلبك، لنواياك، محاولاتك ... فـ حاولي، وجربي، وابدئي، واثبتي، وربنا مش هيضيعلك تعبك أبدًا.
ابعتِ المقالة دي لأي واحدة ممكن تكون مكتئبة عشان جاتلها البيريود في العشر الأواخر. خلّيها تبقى سبب في رفع همّة بنت تانية كانت هتفوّت كل الثواب. وإنتِ؟ خدي أول خطوة دلوقتي... ولسه الفرصة ملحوقة جدًا جدًا.
كتابة: BMD
مقالات مشابهة
تعليقات
إرسال تعليق
متنساش تشاركنا برأيك