حوار بعنوان "إثارة الشغف" مع "محمد صلاح" أحد كُتاب كيان نصوص عظيمة

 

محمد صلاح كامل محمد، 24 سنه، من محافظه الوادي الجديد، خريج كلية التربية جامعة الوادي الجديد، شاب زي أي شاب بحب الكتابة والقراءة من صغري، بدأت كتابة بالتحديد من 2020. 

▪️ ازاى اكتشفت إن عندك موهبة الكتابة؟

من وأنا في 2020 بدأت أثير شغفي وافكر وأكتب، وواحدة واحدة ابتديت أخد رأي أصدقائي، وواحدة واحدة بدأت بالنشر علي منصات التواصل الاجتماعي، ومن هنا عرفت إني عندي الموهبة، وواحدة واحدة ابتديت أطور من نفسي. 

▪️ قصدك إيه ب "أثير شغفي"؟! 

أقصد إني في البداية كنت بكتب شعر وكده، بس كنت بحتفظ بيه لنفسي، في مرة كتبت خاطرة ونشرتها على الفيس عندي جابت إعجاب كتير، الشغف زاد عندي، وابتديت أفكر بشكل أكبر وأكتب، ابتديت أخد رأي صحابي، وكنت بنشر علي السوشيال ميديا، من وقتها يعني اكتشفت إني موهوب في الكتابة. 

▪️ مين اللي وقف جمبك وشجعك من بدايتك لحد دلوقتي؟

الحقيقة ... في البداية محدش دعمني طبعا، لأن عندنا في البلد أو معظم الشباب مش بيهتموا بالكلام ده لحد، مادخلت الجامعة اتعرفت علي شباب أكتر، كنت بردو محبط إلي حد ما لأن حسيت في البداية خالص محدش بيستجيب أو بيعجبه الكلام، لحد ما صديقي "مصطفى" أول واحد أخدت رأيه وشجعني، وابتدى هو نفسه ياخد بإيدي ويقعد معايا واللي كنت بكتبه كان ينشره عنده باسمي وكده، ولما ابتديت الإعجابات تزيد كنت عملت صفحه باسم "خواطر أدبية" بس للاسف اتحذفت من الفون التاني. بردو صحابي في الجامعة كنا نقعد مع بعض وابتدوا يهتموا بالكلام وينشروه عندهم وكده، وزي ما قولتلك ابتديت انشر على الفيس وعلى صفحات الفيس وكده. بس أنا عندي الموهبة والشغف بس المشكلة إني مش متفرغ ليها بحكم شغلي للاسف. والحقيقه يعتبر أول مرة ادخل مسابقة، ومكنتش متوقع إني اكسب تبع الكيان.

▪️ كلمنا عن الكيان شوية

عرفته من خلال الفيس بوك، دخلته من فترة قريبة جدا. الحقيقه لقيته بيساعد علي تقديم المواهب، بيحفز الشباب من خلال إنه بيقدم الموهبة يعني بيقبل المنشورات وده في حد ذاته تشجيع ليهم، عكس بعض الصفحات بيبقي صعب أنهم يقبلوا مواهب منشورات يعني إلا حاجات معينة، كمان بيقدم الشباب بصورة كويسة وبيشجعهم جدا جدا، من خلال الاشتراكات في الكتب والمسابقات زي ما قولتلك.

▪️ إيه أكتر فن بتحب تكتبه؟

بحب اكتب شعر وخواطر

▪️ مين أكتر حد بتحبه تقرأ له وليه؟

كتير الحقيقة، بصي هو عامة أكتر حد كنت بهتم به هو محمود درويش، كتاباته معبرة وجميلة وذات معني. إنما لو على الشعر كنت بحب هشام الجخ جدا وفارس قطرية وفاروق شوشه زمان بردو كنت بحبه جدا، المتنبي أخدت فترة كنت ببحث عنه واقراء له كتير بس الحقيقه بطلت اهتم بيه، تحسيه بيمدح كتير اوي يعني، غير كده الجيل الحالي غير زمان.

▪️ مين مثلك الأعلى ونفسك تكون زيه؟

فارس قطريه الحقيقة، نفسي أكون زيه بس صعب أوصله طبعا.

▪️ بتتعامل ازاي مع النقد السلبي 

برمي ورا ضهري أي كلمة مالهاش قيمة.

▪️ إيه أكتر تعليق سمعته من حد وأثر فيكي؟

أكتر تعليق إن واحد صحبي قالي يابني بطل الهبل اللي بتكتبه ده كتابة إي وبتاع إي هو أنت مفكر نفسك نجيب محفوظ ... الحقيقه ممكن تشوفيه تعليق سازج، لاكني حطيته كحافز، وقولتله الأيام بينا وهتشوف أنا هعمل إيه وهحاول اوصل.

▪️ إيه المشاكل اللي واجهتك في حياتك ك كاتب و اتعاملت معاها ازاي؟

المشكلة إن معظم صحابي بيفكروا إني شخص كئيب من خلال اللي بكتبه يعني ... هي مش مشكلة بس إحنا للاسف معندناش المناخ اللي بيخليكي تحبي المجال، أكتر حاجه مسعداني هي السوشيال ميديا، بس ممكن أقول إن كلمة عمرك ما هتوصل وأنت مش كاتب ولا هتعرف بعتبرها حافز أكتر

▪️ ازاي بتطور من نفسك؟

ممكن أقول بالإهتمام يعني بقرأ كتير، بفكر وبجلس مع نفسي، عندي كراسة اللي هو بحاول ادون فيها، يعني ممكن مثلا أكتب جمله واحس فيها خطأ بحاول استفيد واصححه، وإني بردو بتابع صفحات على الفيس وكده وتطوير الكتابة.

▪️ في حالة معينة بتحب تكتب فيها؟

 الاكتئاب 

▪️ نصيحة تقولها لحد عايز يبدأ في المجال الكتابة 

هو أنا شايف إن أي حد ينفع يبقي كاتب، بس بالفكر والسعي، بلاش تستسلم ولا تحبط، بالعكس خلي النقد حافز ليك، اسعي واجتهد وسلم أمرك لله، مسيرك في يوم هتوصل، وياريت أي حد مايخدش بكلام الناس لأنه بالفعل بيدمر ومبيقدمش خطوة.

✍️ بسمله دهب
#عبثيون #3abthion #عبثيون_العصر_الحالي