حوار جديد مع موهبة مميزة اكتشفت بمحض الصدفة وأبدعت فى كتابتها

 

عرفينا بيكي أكتر؟ 

ميادة أحمد سليم، عندي 23 سنة، من محافظة القليوبية. 

بتكتبي من امتى وازاى عرفتي إن عندك موهبة الكتابة؟

بكتب من 2018، عرفت إني عندي الموهبة لما كنت بكتب مذكرات، شافتهم أقرب صديقة ليا وقالتلي إني أسلوبي جميل في الكتابة ولي مفكرتش أكتب قصص وانزلها على السوشيال ميديا، وبدأت فعلا بكام اسكريبت في الأول ونزلتهم، ولقيت تشجيع كبير من صحابي.

مين اللي وقف جمبك وشجعك من بدايتك لحد دلوقتي؟

من البداية ولحد دلوقتي ماما واخواتي، وصديقتي.

إيه أكتر فن بتحبي تكتبيه؟

بحب أكتب القصص القصيرة، وبحب أكتب الروايات. 

مين أكتر حد بتحبي تقرأ له وليه؟

للعرب: بحب أقرأ لـ عمرو عبد الحميد، عشان بحب الفانتازيا والخيال العلمي جدًا.

للغرب: أجاثا كريستي، عشان ليها اسلوب رائع، وكمان روايتها بتكون فيها غموض بيجذبني جدًا. 

نفسك تكوني زي مين من الكُتاب؟

نفسي اكون زي أجاثا كريستي، حقيقي رواياتها ليها طعم مختلف.

إيه أكتر حاجة فخورة إنك عملتيها؟

أكتر حاجة فخورة بيها وهي إني مدربة كورسات كتابة، وأخطاء إملائية وعلامات ترقيم، بكون فخورة أوي بنفسي لما حد يجي يقلي "أنا اتعلمت منك شيء". 

كلمينا عن أول عمل ليكي

أول عمل ليا نزل معرض ساقية الصاوي 2024/21/8 هو عبارة عن مجموعة قصصية بعنوان (وكأن كُل الطُرق تؤدي إلى الغابة) عبارة عن 3 قصص.

القصة الأولى بتتكلم عن يأس من بعد الثانوية العامة لشاب إسمه (مؤمن) قرر إنه ينتحر في غابة مشهورة بانتحار الطلاب فيها، ولكن لما يروح هيلاقي عكس كدا، وإنها غابة النجاح والفلاح، هيقابل نوّارة إلي هتغير حياته تماما. عنوان "شبح فتاة الحُلي". 

والقصة التانية بنتكلم عن عواقب الكذب، وقد إيه هو قادر يدمر العيلة. عنوان "كان يا جُلنار". 

القصة التالتة بتتكلم عن مديرة شركة مبتوظفش غير رجاله، ومتسلطة بتكره الرجاله جدًا، لدرجة إنها بتحولهم لمخلوقات خاضعة مطيعة ليها، وبتخلق ليها عالم في غابة لوحدها، ولكن إلي هتفسد عليها خطتها هي خطيبة موظف عندها،بعنوان "ذكر كان أم أُنثى". 

إيه أكتر تعليق سمعتيه من حد وأثر فيكي؟

"أنا فخورة بيكِ" بسمعها دايمًا من صحابي. 

إيه المشاكل اللي واجهتك في حياتك ك كاتبة و اتعاملتي معاها ازاي؟

اتعرضت لمشاكل كتيرة في الوسط الادبي، زي النصب والاستغلال، طبعًا اكتسبت خبرة كبيرة منها، ولكن اتعاملت معاها بالاعتزال فترة، ولكني رجعت من تاني.

ازاي بتطوري من نفسك؟

دايما بطور نفسي عن طريق الكورسات، وكمان بتدرب تحت يد أفضل المدربين في الكويت، مدربي وكاتبي المُفضل (مشعل الشمري). 

في حالة معينة بتحبي تكتبي فيها؟

لا، أنابكتب في أي حال من الأحوال.

شايفة نفسك فين قدام، إيه هو حلمك اللي بتسعي لتحقيقه؟

هو أنا حاليًا بسعى لأني أكون مدربة وكاتبة، عشان كدا مركزة على النقطين دول، الكتابة والتدريب. 

هل بتشتغلي على عمل جديد، وايه هو؟

نعم، رواية إن شاء الله. 

نصيحة تقولي ها لحد عايز يبدأ في المجال الكتابة؟ 

نصيحتي لأي حد في مجال الكتابة، بلاش تخلي حد يستغلك، أو يستغل خبرتك في أي شيء، وكمان حاول تطور من نفسك في اللغة العربية بشكل عام، وكمان اتعلموا التدقيق اللغوي، لأن لا بُد للكاتب أن يكون مدقق.

✍️ رحمة عبد العليم