ازاي تعرفي إنك فى علاقة توكسيك
كلنا بنمر بعلاقات كتيره بنستهلك فيها ومش عارفين إيه السبب ، أو مش عارفين مين السبب هل التقصير مننا فعلا ولا من الطرف التاني، وكلامي هنا على العلاقة العاطفية بس ، مين فينا معداش عليه ناس توكسيك استهلكته أو مازالت بتستهلكه ومش عارف يحدد السبب منين ، أنا هنا هقولك على كام نقطة ممكن تكون سبب إن العلاقة دي توكسيك وبتستهلكك نفسيا .
1- متمشيش لحد شارع وهو بيمشيك خطوتين :
يعني متبقاش الطرف الأكثر حماسا وتهلك نفسك عشان حد مش بيبادلك ربع اللي بتقدمه ، مع الوقت هتتعب وتحس إن طاقتك خلصت و أول ما تبدأ تنسحب الطرف التاني هيعتبرك غدار ومبقتش زي الأول وهيبقى كل اللي بتقدمه حق مكتسب.
2- متتنازليش عن مبادئك أبدا لأي حد :
أول ماتبدأي تتنازلي هتبدأ سلسلة تنازلات ومش هتقف ، ومتفكريش إنك هتتشكري ، في الأخر هيتقالك أنا مطلبتش منك ومليش دعوة، لا وممكن تلاقي نوع تاني يقولك أكيد كان ليكي مصلحة من التنازلات دي مش معقولة ضحيتي عشاني ببلاش كده، خليكي واثقة إنك لما تحترمي مبادئك الطرف التاني هيحترمها ومستحيل يطلب منك تتنازلي عنها لأي سبب من الأسباب.
3- متسمحيش للطرف التاني يتعدى على مساحتك الشخصية :
كل طرف ليه مساحته الشخصية دي اللي بتساعدنا نصفي أول بأول خلاقاتنا ويكون كل طرف ليه وقته ومساحته يقدر يعمل فيها اللي عاوزه .
4- لو بتبرري كل حاجة اهربي:
لو محستيش نفسك مفهومه في العلاقة اعرفي إنك هتقعدي عمرك كله تبرري كل تصرف وكل كلمة تقوليها ومش دايما الطرف التاني هيصدقك، وكلامي مش على تبرير الكلام اللي طبيعي يتفهم غلط أوقات وممكن يجرح الطرف التاني ، لا أنا بتكلم على المواقف العادية اللي بنعيشها يوميا، لو لقيتي نفسك بتبرري أبسط التصرفات يبقى أنتِ في علاقة توكسيك واهربي.
5- لو لقيتي نفسك بتصالحيه وهو اللي بيتقمص أجري تعرفي تجري ولا أشيلك وأجري ؟!!! :
الطبيعي إن الرجال قوامون عن النساء، والراجل يحترم طبيعتك الأنثوية واللي بجد يعرف يزعل امتى وازاي ، مش ياخد دورك أنتِ في العلاقة ويتقمص وأنتِ بقا تصالحيه وتتشقلبي ، طبعا كلنا عارفين الفرق بين الزعل اللي من مواقف تستحق ويكون بطرق متجرحش رجولته وتغير صورته قدامك وبين القمص اللي من أقل حاجة، وأنتِ كل دورك تمشي وراه زي البيبي تراضي فيه ، البيبي ده بيروح عند طنط تطبب عليه هي إحنا عاوزين راجل قوااام.
6- اللي يقولك بعيدًا عن الدين في أي نقاش:
دلوقتي في شباب كتير بعيدة عن ربنا وعن الدين وكل تفكيرها مستحدث وبتاخده من الغرب ، أول مايبدأ النقاش ب بعيدًا عن رأي الدين أعرفي إنه كده مفيش أمل من العلاقة دي مهما حاولتي لأن الأساس بتاعها بايظ.
7- لما تلاقية بيبعدك عن صحابك و أقرب الناس :
اتأكدي إنه أول ماتبعدي عنهم هو أول واحد هيسيبك ، بس مش هيسيبك كده بسهولة لا طبعا ياحبيبتي ده هيجبلك تروما عنب قبلها ، لأنه ببساطة اللي يتخلى عن أقرب الناس ليه يستاهل اللي يحصله، متبيعيش صحابك وأهلك عشان راجل، لأنه لو بيحبك بجد هيحب اللي بيحبوكي واللي بتحبيهم ومش هيحرمك منهم.
8- الخيانه بكل اشكالها :
مش بس خيانة الجسدية لا كل أنواع الخيانة و أولها النظرة ، والرجالة اللي هتقول حتى النظرة حرمتوها وبقت خيانه هقولهم اه في فرق بين النظرة الشريفة والنظرة اللي مفهاش شرف وأخلاق ، اللي بيحبك مش هيشوف واحدة غيرك لأنك مالية عينة وقلبه ، واللي يقول عكس كده يبقى مش بيحب بجد .
9- احترامك من احترامه :
يعني ميسمحش لنفسه قبل أي حد إنه يقلل منك ، وكل الناس تحترمك فى وجوده وغيابه .
10- يحترم طبيعتك الأنثوية :
يعني ميقارنكيش بيه ، يحترم مشارعك وهرموناتك اللي بتأثر عليكي في بعض الأحيان ، يدعمك ويحسسك بالأمان لأن ده فرض عليه في العلاقة ، يحترمك ويصونك وقت تعبك وصحتك ويكون سندك قبل أي حد ، وأنتِ أول أولوياته.
11- "أنا عاوزه ورد يا إبراهيم":
لازم شريكك يعرف لغة الحب بتاعتك ويشبعهالك ، متستهونوش بالنقطة دي عشان مهمة جدًا في العلاقة ، في ناس لغة حبها الكلام الحلو مثلا وشريكك بيقدملك الفيزيكال تاتش مش هتحسي بالاشباع العاطفي ، أو أنتِ بتحبي مثلا تعبري عن حبك ب أكلة حلوة وهو بيقدملك ورد مش هتحسي بيه لأنه مش لغة حبك ، وهو مش هيعرف لغة حبك غير لما تقوليلة برضو متصعبيهاش عليه.
12- هو مش محور الكون :
مبقولكيش متخليهومش من أولوياتك، بس في نفس الوقت ميبقاش هو الأول والوحيد، ولو هو وصلك للنقطة دي معناه إنه توكسيك، ليكي حياتك ودراستك مثلا أو شغلك أو اهلك، في اوبشنز كتير موجودة، متجيش على حاجة على حساب حاجة تاني، زي ماهو عنده شغله وأصحابه وأهله وكل حاجة فيهم واخدة حقها أنتِ كمان متجيش على حاجة منهم عشان خاطره. الراجل لما يحسك فاضية ومعندكيش حاجة تشغلك غيره هيزهق منك، طبيعة الراجل بيحب الحاجة الصعبة اللي لازم يبذل مجهود عشان ياخدها، خليكي فى السهل الممتنع.
في النهاية أحب كل بنت تفهم كلامي صح وتلحق نفسها من العلاقة التوكسيك اللي بتعيشها وتعرف مقدار نفسها كويس وإنك تستاهلي حد يصونك يعتبرك أهم إنجازاته ، هستنى اسألتكم ورأيكم فى الكومنتات. وتقدروا تبعتولي برايفت على انستجرام rahma.abdelalem.1
ومتنسوش تتابعونا على السوشيال ميديا بتاعتنا عشان تشوفوا كل جديد 💛🌟
#عبثيون #عبثيون_العصر_الحالي #3abthion #أنا_امرأة #الطاقة_الأنثوية #طاقة_الأنوثة #رحمة _عبد_العليم
انا بحب جدا طريقتك ف المقالات وبحب اكتر اسمع رايك في حاجات كتير ويمكن انا ع المستوي الشخصي بحبك جدا وبحب رايك في حاجات كتير
ردحذفبتمنالك كل التوفيق والنجاح دايما