من شجرة نبق عادية لمصدر علاج
زي ما اتعودنا إن مسلسل المداح يفاجئنا كل رمضان بأحداث شيقة وكشف أسرار، السنادي خدنا معاه لأماكن في مصر مش كلنا على علم بيها. زي مثلا شجرة الدم اللي هيستخدمها في تكوين ترياق المرض الجديد، فيا ترى إيه حكاية الشجرة دي ومكانها فين.
الشجرة دي معروفة بإسم شجرة الدم أو شجرة العارف بالله، وهي في منطقة نجع الخولي بمدينة دشنا، في محافظة قنا، أصلها شجرة نبق، وعمرها أكثر من 700 سنة، وأهل القرية قالوا إن الشجرة مرتبطة بوفاة اللي زارعها وهو العارف بالله الشيخ نصر الدين.
وقالت الأهالي إن الشيخ نصر الدين كان بيحب الأطفال ويعطف عليهم، وكان بيحب يُطعم الغرباء وأبناء السبيل من خيرات شجرته، ويُقال إنه في اليوم اللي اتوفى فيه، كانت الشجرة بتنزف الدم ده، حزنًا على وفاته، ومع مرور الأيام توافد الناس من كل القرى لزيارة المقام والشجرة، ومن هنا اتخذت الشجرة صفة الوفاء.
ومن العادة إن أطفال نجع الخولي بيتسلقوا الشجرة لاستخراج المادة الصمغية دي عن طريق قطع جزء منها مع القطن أو القماش لامتصاصها من شقوق الشجرة، كمان الدم مش بينزل إلا يوم الجمعة.
و المادة دي أو الدم اللي بيخرج من الشجرة بيستخدم في علاج أمراض كتيرة زي الأمراض الجلدية وغيرها، وناس كتيرة أوي بتتبارك بيها، وفي علماء كتير احتاروا في سر شجرة الدم، ومع ذلك اجمعوا إن الدم ده بيستخدم في الشفاء، خاصة إنه من شجرة نبق المذكورة في القرآن الكريم.
ومن أبرزهم كان الدكتور مجدي شاكر، كبير الأثريين بوزارة السياحة والآثار، وقال : "سر هذه الشجرة حتى الآن مش لاقيين له تفسير، إزاي بتطلع هذه المادة في يوم محدد ولكن المتفق عليه إنها بتستخدم في صنع الأدوية وعلاجات العديد من الأمراض".
✍️ بقلم مريم محسب
متنسوش تتابعونا على السوشيال ميديا بتاعتنا عشان تشوفوا كل جديد 💛🌟
#عبثيون #3abthion #عبثيون_العصر_الحالي
♥️♥️♥️
ردحذف