ازاي تخليه يشوفك أغلى حد فى حياته وميفكرش يخسرك أبدًا

 كتير من البنات بتقع في أخطاء مش واخدين بالهم منها بتبوظ علاقتهم بشريك حياتهم، وبسبب الأخطاء البسيطة المتراكمة بيحصل فتور وبرود في علاقتك بشريك حياتك وبتتعرضي للخيانة أو للهجر أو للبرود من الطرف التاني وانت مش واخده بالك، عشان كده هديكي كام نصيحة تاخدي بالك منهم عشان تجددي الشغف في علاقتكوا تاني.

1- الليونة والنعومة فى الكلام : 

خليكي دلوعة وبلاش تنكدي وتركزي فى أبسط التفاصيل، فى ايديكي سلاح لحل كل مشاكلك أستغليه صح وخليكي ذكية، لما تكوني محتاجة حاجة من شريك حياتك أتكلمي برقة وأطلبي منه بصيغة أنه هو سندك وضهرك وملكيش غيره وانا عارفه انك مضغوط ياحبيبي بس البيت محتاج وانا نفسي والعيال محتاجة وبدلع هينفذلك كل الي انت عاوزاه ، لكن لو قولتيله انا عاوزه كذا وكذا وانت مقصر معايا والبيت والعيال وضاربه بوز هيقولك الشغل والظروف وهيعند معاكي ومش هتستفادي حاجة.

2- كوني المساحة الي بيرتاح فيها" comfort zone" :

خليكي الحضن الي لما تكون الدنيا ضيقة وصعبة عليه يجري ليه ، الراجل مهما كان قوي بيحتاج حاجة واحده بس من شريكته وهي الأحتواء والحنية والطبطبة ، بلاش لما يحكيلك مشكلة عنده تقعدي تأنبي فيه أو تكبريها قوليله متقلقش كل حاجة هتتحل انا واثقة فيك وقومي اعمليله حاجة حلوة بيحبها وصدقيني هتلاقي نتيجة ده معاكي وعلاقتك هتكون مستقرة اكتر.

3- أهتمي دايما بمظهرك قدامه :

زي ما الرسول عليه الصلاة والسلام وصانا قال اذا نظر اليها اسرته ، يعني يشوفك دايما فى كامل اناقتك ومهتمية بنفسك حتى وانت فى المطبخ بتعملي الاكل ، البنت الي طاقتها متوازنة مبتعرفش تسيب نفسها شكلها مبهدل أو مش منسق دايما بتهتم بشكلها ولبسها فى أي مكان بتروحه حتى لو نازله السوبر ماركت ، طبعا مش بالتبرج برا البيت لكن فى البيت تبرجي عادي براحتك.

4- ركزي دايما فى كلامك معاه :

يعني لو قدامك اوبشن انك توصلي كلامك بأسلوب لطيف متختاريش الأسلوب الأوحش ، لو عمل حاجة تزعلك متقوليش أنت ضايقتني وانت وانت... أستبدليها ب انا عارفه انك مش قصدك ودي مش طبيعتك بس الي حصل ده خلاني احس احساس وحش ، لو عاوزه تطلبي منه الاهتمام متقوليش الاهتمام مبيطلبش وانت دايما مش بتهتم بيا أستبدليها ب انا عارفه انك مضغوط الفترة دي بس محتاجة نتكلم شوية .

5- كل الي نفسك فيه منه قوليله انت بتعمله :

فى حيلة نفسيه بتعدلي بيها سلوك الشخص بطريقة غير مباشرة انك تمدحيه فى حاجات نفسك يعملها وبالتالي هو بيعملها ، يعني لو مش بيهتم بيكي قوليله أكتر حاجة بحبها فيك اهتمامك بيا ودلعك ليا ياحبيبي اراهنك انك هتلاقيه تاني يوم بيدلعك ، وقيسي على الفكرة دي كل حاجة ، لو عنده أي سلوك مش عاجبك قوليله انك بتحبي العكس الي هو بيقدمهولك حلو اوي هتلاقيه أتغير وبيعلي عليكي كمان .

6- لو خانك تتصرفي ازاي : 

أوقات خيانة الراجل مش بتكون بسببه هو بس ساعات تقصيرك بيخليه يوصل للمرحلة دي و وقتها بيكون عنده حق ،انا طبعا مش بقف مع الراجل الخاين ولا بدعمه بس مش هنخرب البيت وننكد على نفسنا عشان واحده مش كويسة قررت تدخل فى علاقة مع واحد مرتبط ، تعالي اقولك لو ده حصل نحل المشكلة دي ازاي ، طبعا أي بنت اول حاجة هتعملها هتطلب الانفصال وتنكد عليه وعلى نفسها وثقتها بنفسها هتتهز ، بس الذكية هتتصرف عكس كده تماما انت هتلبسي احلى حاجة عندك وتحطي برفيوم جامد جدا وتقعدي بكل ثقة وتتعاملي عادي جدا ولا كأن حصل حاجة وهو هيشك فى نفسه وازاي ده مأثرش عليكي ولا هز ثقتك بنفسك وهيفتح معاكي كلام ويحاول يراضيكي وقتها تعاتبيه بكل رقة و أوعدك مش هتتكرر تاني أهم حاجة متخليش ثقتك فى نفسك تتهز عشان ده لو حصل هيقلب الترابيزة عليكي فورا.

7- كوني اش اش هيكونلك رجب الجريتلي :

خدي الصفات الايجابية من الشخصية وسيبك من التفاصيل التانية ، دلوقتي طالع تريند والبنات كلها نفسها فى واحد زي رجب الجريتلي ، قولتلكم فى بداية السلسلة لما توازني بين طاقتك الأنوثية والذكورية هتجذبي لنفسك شريك طاقته الذكورية عالية ، اش اش واثقة فى نفسها جدا وعمرها ما اتهزت بسبب أي حد ولسانها حلو بتعرف تقول ايه وامتى وازاي وامتى تتكلم وامتى تسكت وبتدلع قدام رجب وأي مشكلة بتقع فيها بتجري عليه وتحسسه انها محتاجاه وهو فى المقابل وفرلها كل حاجة البنت بتحتاجها أمان وسند واحتواء وحب ودلع .

فى نهاية المقال اتمنى كل بنت تقرأه تستفاد منه ويفرق معاها فى حياتها الشخصية وتكون حياتها مستقرة مع شريك حياتها ، فى انتظار رأيكم وتعليقاتكم ، وأي سؤال ممكن تبعتوه على صفحتي الشخصية وهجاوب على كل أسألتكم .