حكاية عبثيون
الحكاية بدأت يوم 20/2/2023
في اليوم ده، اتجمّعت مجموعة من البنات الدراعاميّات في رعاية الشباب، في كليتهم اللي ليها مكانة خاصة في قلبهم كلية دار العلوم. البنات دول كان الرابط بينهم مش بس الكلية، لكن كمان إنهم اشتغلوا سوا في بداية حياتهم، وبدأوا مع بعض يحلموا بيها ويسألوا نفسهم: "إزاي نقدر نحقق حلمنا؟" ... ومع إنهم كانوا زملاء في نفس الكلية، إلا إن المكان اللي اشتغلوا فيه هو اللي قرّبهم من بعض، وجمعهم شغف مشترك: حب الكتابة والصحافة والإعلام. كلهم اشتغلوا محررين في موقع إخباري إلكتروني.لكن لظروف وأسباب معيّنة، سابوا المكان ده. بعدها، بدأت واحدة منهم تفكر: "ليه ما يكونش عندي موقع خاص بيا؟ ليه ما أحققش الحلم اللي معرفتش أحققه هناك؟" وفي يوم، وسط دردشة بسيطة بينها وبين واحدة من زميلاتها، قالت لها الفكرة. زميلتها اتحمّست جدًا، لكن دايمًا كان فيه سؤال معلّق: إحنا مش عارفين هنبدأ إزاي!
لحد ما في يوم، واحدة منهم قالت: "خلاص، كفاية كلام وتخطيط! يلا نحول الحلم لحقيقة ونخلي الأفكار على ورق."
وفعلاً، جمعتهم حواليها على ترابيزة كبيرة في رعاية الشباب، وقالت: "يلا ننفّذ فكرة الموقع.. فكروا معايا: محتاجين إيه؟ وهنبدأ إزاي؟"
وابتدت التساؤلات تنهال:
-
عايزين نعمل إيه؟
-
ليه أصلاً هنعمل ده؟
-
إيه الحاجة اللي ممكن نقدّمها وتكون مختلفة؟
-
هنقدّمها إزاي؟
-
مين هيشتغل على إيه؟ وهيحتاج مين معاه؟
إيه المشاكل اللي ممكن نقابلها؟ وهنعمل إيه وقتها ؟
كل الأسئلة دي اتكتبت واتسجّلت، علشان ما ننساهمش أو نختلف عليهم بعدين. لكن كان فيه سؤال واحد مهم جدًا، وقعدنا وقت طويل نفكر فيه قبل ما نلاقي له إجابة: "هيكون اسمنا إيه؟!"
استنّونا، هنحكي لكم عن الاسم اللي اخترناه وليه اخترناه. 😉✨
 |
| أول ديزاين تم تصميمه ك لوجو لعبثيون |
لو عجبتك الحكاية، مستنيينك معانا على منصاتنا 👇🏻
تعليقات
إرسال تعليق
متنساش تشاركنا برأيك