5 حاجات تجنبيهم لعلاقة صحية مع شريك حياتك

 

فى بعض الأخطاء إحنا كبنات بنقع فيها في علاقتنا مع شريك حياتنا من غير مانحس أو بغير علم مننا وبتأثر على علاقتنا بيهم جدا. 

حاولت الخصهم فى أهم 5 نقط وهعرضهم بالتفصيل.

1- المقارنة العقيمة بين الراجل والست في كل حاجة:

 خلينا متفقين إننا مش شبهم في أي حاجة ومن الطبيعي منقارنش نفسنا بحاجة مش شبهنا، كتر المقارنة مع شريك حياتك هيقلل منك وهيبدأ بينه وبين نفسه يعاملك كأنك واحد صاحبه ومش هيحترم طبيعتك كأنثى رقيقة مختلفة عنه، قولنا قبل كده فى المقال السابق إننا مختلفين عن الراجل بيولوجيا وسيكولوجيا وكل حاجة وطريقة تفكيرنا واستقبالنا لأي حاجة مختلفة عن الراجل، ميبقاش ربنا كرمنا كنساء مسلمات وفرض على الراجل إنه يهتم بينا ويحافظ علينا والرسول عليه الصلاة والسلام وصاهم علينا وإحنا نيجي نبوظ كل ده ونطلب إننا نتقارن بالراجل ونتعب ونشقى زيه ويمكن أكتر منه فى بعض الاحيان.

2- كل واحد يبص فى ورقته:

بلاش تاخدي دورك ودوره فى العلاقة، عارفين إنك ست قد المسؤلية وجدعه جدًا، بس ميبقاش بأفورة لأنه بيعلم الراجل الاعتمادية. أنتِ ليكي دور وهو ليه دور، أنتِ ليكي مسؤلياتك وهو كذلك، لما تكون ظروفك حكماكي إنك تاخدي الدورين عشان لوحدك مفيش مشكلة لكن لو شريكك موجود في حياتك يبقى تسبيله مساحة إنه يقوم بواجباته ومسؤلياته، قولنا قبل كده إن الراجل لغة الحب عنده بالفطرة العطاء لو سمحتي سيبيه يعيش ذكورته متاخديهاش منه .

3- خلي لنفسك الأولوية:

كل ماتحبي وتهتمي بنفسك هينعكس على نفسيتك بالايجاب وبالتالي هينعكس على علاقتك بشريكك، بلاش تكوني نسخة من أمهاتنا اللي كل أولوياتهم البيت والعيال والراجل وراكنين نفسهم على جنب، عشان أنتِ لو بتحبي نفسك بجد هتقدري تكوني أم سوية وزوجة سوية وتقدري تقومي بكل واجباتك ومسؤلياتك على أكمل وجه، خليكي متأكدة إن أولادك عاوزين أم مبسوطة وسوية نفسيا وزوجك عاوز زوجه سوية نفسيا وكلها طاقة إيجابية، ملهاش لازمة تهلكي نفسك وفي الاخر تشتكي من إهمال زوجك ليكي وخيانته، متنتظريش مني أقولك الخيانة ملهاش مبرر عشان هي ليها مبرر اه وأولهم إنك متهتميش بنفسك وتحبيها صح، نفسك هي أكتر حاجة هتبذلي فيها مجهود وهتلاقي نتيجته فورية.

4- بلااااش تنازلات ابوس إيدك:

الراجل لما يلاقيكي بتتنازلي عن حقوقك هيضغط عليكي أكتر عشان يشوف أخرك فين، وكل ماتتنازلي أكتر العد التنازلي لنهاية علاقتك بيه هيبدأ، مبقولكيش متحسيش بظروفه لو هو ماديا مش مقتدر متطلبيش فوق طاقته، لكن متتنازليش عن حقوقك كزوجة أو كامرأة، وخليكي متأكده إن محدش هيحبك ويخاف على مصلحتك أكتر من نفسك.

5- بلاش تدخلي الشك وروح المحقق كونان حياتكم:

عارفة إن اللي هقوله ده ممكن بنات تفتكره غريب ومتتقبلوش بس إحنا متفقين إن مصدرنا الأساسي للمعلومات هو القرآن الكريم والسنة النبوية وبلاش أفكار مستحدثة، بلاش تشكي في شريكك وتدوري وراه وتفتشي فى فونه وتحسسي نفسك وتحسسيه بعدم الأمان والاستقرار، عارفة إنه مش بمزاجك وإحنا كبنات عندنا قرون استشعار وبنحس بالخيانة بس حاولي متفتشيش لو جاتلك المعلومة لحد عندك تمام لكن أنتِ متسعيش إنك تدوري، لانه حراااااام وممكن تراجعي من أي مصدر وتتأكدي من ده. 

وأقولك على حل كنت سمعته من الدكتورة هالة سمير عن الخيانة وهي إنك متفضحيش زوجك لأن معصية انتهاك ستر ربنا لحد كبيرة جدًا، والحل إنك تصبري وتدعي ربنا بصلاح حاله وصدقيني في يوم وليلة ربنا هيبدل حاله لأن قلوبنا في ايدين ربنا مش فى أيدينا، وكونك قررتي تصبري على ابتلائك ومتغضبيش ربنا صدقيني هيجازيكي خير وهتلاقي البركة في علاقتك بشريكك أكتر من قبل كده.

وفي نهاية مقالنا أتمنى يكون عجبكم، وأتمنى كل بنت تقرأ الكلام ده وتستفاد منه وياريت تبعتوه لكل البنات اللي تعرفوها عشان يستفادوا هما كمان، وهستنى تعليقاتكم ورأيكم فى الكومنتات. وتقدروا تبعتولي برايفت على انستجرام  rahma.abdelalem.1

متنسوش تتابعونا على السوشيال ميديا بتاعتنا عشان تشوفوا كل جديد 💛🌟

• Facebook page
  
• Facebook group
  
• Instagram
  
• whatsapp channel
  
• tiktok
  
• YouTube
  
• telegram
  
• Spotify
  

#عبثيون #عبثيون_العصر_الحالي #3abthion #أنا_امرأة #الطاقة_الأنثوية #طاقة_الأنوثة #رحمة_عبد_العليم