حوار خاص مع الفوتوغرافر الشاب"زياد ياسر"
مصور فوتوغرافر شاب فى مقتبل العمر أثبت نفسه فى مجال التصوير وقدر يبدع ويبرز موهبته فى شوارع مصر ومناظرها الطبيعية التي لا يعلم عنها الكثير، وله العديد من الأعمال التي أبرز فيها موهبته بشكل مميز، وهو من أفضل المصورين فى مصر على موقع 35awards العالمى لمسابقات التصوير، معكم فى حوار خاص زياد ياسر يملك من العمر ٢٣ عام، أصوله من رشيد محافظة البحيرة، خريج دبلوم فنى دفعة ٢٠١٨.
أمتى بدأت فى التصوير واكتشفت موهبتك؟
بدأت التصوير سنه ٢٠١٧ لما رحت رحلة مع أهلى ل مرسى مطروح البدايه الفعليه سنه ٢٠١٩.
اتعلمت التصوير فين وازاي؟
والدى من وهو صغير كان عنده كاميرا وبيوثق اللحظات العائلية وصحابه وكده ف أنا خدت النقطة دى منه وكمان حبيت التوثيق والإحتفاظ بالذكريات
بدأت برضوا احضر ورش تصوير وانزل إيڤنتات واقرا وابحث واعلم نفسى الكادر والايديت كمان.
إيه هو حلمك وهل حققته ولا لا؟
حلمى الأكبر إنى أكون مصور لدى ناشونال جيوغرافيك. تانى حاجه نفسى أفضل أوثق وأظهر الأماكن المهمشة والبسيطه وأظهر قوة الأماكن دى بالصور والكادرات. نفسى برضوا أكون صاحب أفضل فيلم قصير فى أى مهرجان.
من هو مثلك الأعلى؟
فى مصر أحمد فليكس و أحمد منصور و جيده أنيس
ومصور عربى ومخرج أفلام قصيره اسمه مهند أبو رزق، برا مصر ستيڤ ماكورى مصور ڤيتنامى Tran tuan viet.
مقولة معينة بتحبها وبتتأثر بيها؟
مقوله من تأليفي "نظرة مختلفة تغير الكثير" و"إن الله لا يضيع أجر من أحسن عمله".
مين كان بيدعمك؟
أهلى أكيد وبذات والدى لأنه كان بيصور خلال حقبة الثمانينات والبعض من صحابى والمعارف السطحية.
هل واجهت ناس بتحبطك؟ ولو اه اتعاملت معاهم ازاي؟
أكيد طبعاً ناس كتيره من أهلى وصحابى وكمان ناس من كواليس التصوير فى الشارع أو أى مكان بكون فيه بس ولا كأن حد موجود مش بسمع لحد ومش مهتم واحدة واحدة الموضوع بقى سلس.
قولنا على الحاجات الي شاركت فيها؟
شاركت فى مسابقة عندما يتوقف الزمن مع متحف رشيد الوطنى ومشروع المبانى التراثيه والأبواب القديمه. فيه بقى إيڤنتات تصوير و workshop وورش تصوير متعدده وصانع أفلام قصيره مبتديء. نزلت ايڤنتات مع جروب خلى مصر أجمل، صورة وحكاية، وتجمعات مصورين بيجوا من القاهرة واسكندرية بكون متواجد معاهم. اخرجت وصورت فيلمين، الأول الرجوع إلى الماضى، الثانى أنت مش لوحدك. وفيلم من فتره بعنوان قلعة قايتباى فى برج رشيد.
فى نصيحة تحب تقدمها للشباب اللي حابة تتعلم التصوير؟
طول ما أنت بتعمل حاجة بتحبها ومش بتغضب ربنا كمل متوقفش ومتسمعش لحد وتقبل النقد البناء عادى، طول ما أنت بتجتهد وبتسعى ربنا هيوفقك وياخد بيدك وهوصلك لحلمك بس فى الوقت المناسب.
✍️ رحمة عبد العليم
#عبثيون #3abthion #عبثيون_العصر_الحالي
تعليقات
إرسال تعليق
متنساش تشاركنا برأيك