حوار شخصي بعنوان "تحدي الأزمات" مع هاجر فريد صاحبة مشروع هاند ميد

 

"عمر ما موقف كسرني أي حاجه بتحصل معايا بتقويني وتخليني أفضل"، استغلت أزمة كورونا بشكل إيجابي وبدأت مشروعها الخاص في مجال الصناعات اليدوية "هاند ميد"، فبدأت بفكرة الهدايا الصغيره والتابوهات حوارنا انهاردة مع هاجر جمال فريد عندها 22 سنة من محافظة أسيوط مركز القوصية. 

▪️كلمينا عن المشروع بتاعتك، امتى بدأتي ورحلتك معاه

المشروع بتاعي مكنش ليه تخطيط مسبق ولا خطة مدروسة حتى، بل كنا كلنا في ظل الظروف الصعبة وهي فترة كورونا، وكانت كل الأشغال متقفلة وكل حاجة واقفة. وقتها أنا كنت شغالة مع شركة وطاحنه نفسي شغل، وكان أول مرتب ليا من الشركة 22ج، الكلام دا من حوالي 5أو 6 سنين. طيب وقتها كان كل حاجة صعبة، فكرت أن كلنا قاعدين في بيوتنا وفي حظر وقت كورونا ف ممكن نبعت ل بعض هدايا نخفف عن بعض الضغط اللي كنا فيه، وبالفعل بدأت في شغل مراسيل الهند ميد والتابلوهات. عملت جروب طبعاً وبدأت شغل فيه وطبعاً ربنا مبينساش.

▪️اتردتي قبل متاخد الخطوة وتبدأي؟ 

في البداية مترددتش ولا لحظة إني أخد الخطوة دي، بالعكس كنت محتاجه إني أخدها بجد. بس بعد كدا اه اترددت شويه علشان طبعاً العدد كان صغير، اللي هو هتشاف ازاي والجروب هيكبر امتى وكل دا. 

▪️ليه كنت محتاجة تاخدها؟ 

أول حاجه كنت محتاجة إني أخد الخطوة دي في الوقت دا علشان كنت محتاجة إني أعمل كل حاجة ل نفسي مقولش ل أهلي إني عايزة حاجة واتقل من عليهم زي م البنات بتعمل. 

▪️إيه اللي خلاكي تقولي لا خلاص أنا هبدأ وخدتي الخطوة؟ 

اللي خلاني أقول إني هبدأ خلاص كانت الظروف وقت كورونا والناس كلها قاعدة، طبعا مفيش شغل مفيش أي حاجة، قولت طب م أعمل حاجه بدل م أنا قاعده كدا، بدأت أعمل جروب ضفت فيه صحابي، وبدأت واحده واحده أكبر في الجروب وأوسع في المجال. 

▪️مين أكتر حد دعمك في مشروعك

 اللي دعمتني هي اختي الكبيره وأمي التانيه أمنه، وهي مصدر الهامي برضو

▪️إيه المشاكل اللي واجهتك من لما بدأتي وقدرتي تتعاملي معاها ازاي

يعني أكبر مشكلة واجهتني هي الناس اللي حواليا، اللي المفروض أقرب حد ليا ويدوني طاقة إيجابية، لا ديما كان بيأثروا عليا بالسلب، حالياً والله العظيم بيتمنوا ارد عليهم ف التلفون عادي. 

▪️شايفة إيه اللي اتغير في شخصيتك بسبب مشروعك 

فكرتي اتغيرت ف كل حاجه حواليا  

شخصيتي اتغيرت 180درجه عن الأول، الشغل بيخليكي تقفي علي رجليكي وتسندي نفسك بنفسك، ومتحتجيش لحد، بيخليكي واقفة علي رجلك، ومحدش يقدر يكسرك وعارفة أولوياتك فين، بيطلعنا من جو الفراغ اللي كل بنت بتعيشوا. ومبقتش بنتظر إن حد يجي يغيرني للأفضل بل بفضل الله بساعد كل بنت مبتشتغلش أنها تشتغل وتقوي وتسند علي نفسها، علشان الشغل بيخلي الواحدة قوية ومش أي حد يضحك عليها وخلاص، وبمشي بمبدأ صدق نفسك إنك هتوصل علشان توصل فعلا، أقداركم توخذ من أفواهك، صدقت وأمانت بنفسي من التلات اوردرات خلال شهر ل واحدة بتبعت اوردرات ف كل محافظات الجمهورية. 

 

▪️إيه الهدف اللي شغالة عليه دلوقتي وعايزا توصيله؟

بجد الهدف اللي شغاله عليه حالياً أن يكون ليا ستور كبير خاص بيا، حاجه تشبه ورشة العمل كدا. واعلم فيهم كل البنات ازاي يشتغلوا ويحفظوا على نفسهم، ويكونوا حد كامل متكامل مش سهل الضحك عليه. 

▪️إيه هي النصيحة اللي تحبي توجهيها لحد حابب يبدأ في المجال دا 

لكل حد شايف أن ف ايده يبدأ ويشتغل ميفكرش كتير بل يبدأ حاليا، لأن الشغل اللي هيخلي ليكي قيمة ويغير تفكير أي واحدة من التفاهة للتفكير مستقر وتفكير عالي، 

بتمني من ربنا بجد أن كلنا يكون ليا شغل وكيان خاص بينا. ولكل حد حابب يبدأ وخايف، حتي لو فشلت متخافش تبدأ من تاني، بجد مش يمكن تكون قصتك الجديدة أحلى من القديمه بكتير.

✍️ بسمله دهب

#عبثيون #3abthion #عبثيون_العصر_الحالي