حوار شخصي بعنوان "تحقق حلم الأصغر في أدب الرعب"
طالب بكلية الحقوق جامعة حلوان، بدأ حلمه منذ نعومة أظافره وكان شغفه فى الكتابة الدافع الأساسي لوصوله لهذا الحلم، وحتى الآن يسعى لتحقيقه، وتكتب سطور بداية حلمه مع رواياته الثلاثة التي تتميز بالإبداع والتشويق فى أصعب أنواع الأدب وهو أدب الرعب.
معكم فى حوار خاص الروائي الشاب "أحمد ناصر"، يملك من العمر ٢١ سنة.
أمتى اكتشفت موهبتك فى الكتابة؟
عندما كان عمري17 عاما.
هل دعمت موهبتك بدراسة فن الكتابة فى إحدى الأماكن المخصصة؟
لا كنت أطور نفسي بنفسي.
لماذا اختارت أدب الرعب بالتحديد؟
لإني حسيت للحظة إني ممكن أعمل حاجة كويسة من خلاله.
هل الروايات التي كتبتها واقعية أم من وحي خيالك؟
عندما كتبت أول ثلاث روايات كانت من خيالي لكنهم كانوا للتجربة والتطوير فقط، لكن عندما بدأت اطور من الكتابة أصبحت بكتب عن أحداث حقيقية وواقعية جدا، لدرجة إني كنت هتأذي في وقت من الأوقات.
هل مريت بمواقف مرعبة فى حياتك الواقعية؟
أعتقد إنه لا يوجد أحد دخل الأدب لم يمر بمواقف مرعبة أو علي الأقل تخيل حاجات أو حلم بكوابيس، في بدايتي كنت بتخيل حاجات وبسمع أصوات لكن كل ما كنت بكبر كل ما كنت أكثر هدوء لإن الأدب ده عايز تحكم في النفس ولازم أكون متحكم بأعصابي مع أي حاجة هكتب عنها.
كنت هتتأذي ازاي ؟
لما ذكرت إسم كتابين سحر حقيقيين، ولما خلصت أول روايتين كنت بسمع أصوات عادية لكن مدلولها كان مرعب وكنت بحلم أحلام غريبة، زي مثلا حلمت حلم قبل كده إن كان فيه واحد كان ماشي في طُرقة البيت، وكان ماسك حاجة في إيده فيها دم، وكان بيطبع بإيده علي الحيطة كفوف، ومرة تانية كنت في درس ورجعت بليل حسيت إن كان فيه حد بيراقبني وكان طالع علي السلم ورايا.
هل في وقت من الأوقات كنت بتخاف ولا مش بتتأثر بقصص الرعب؟
كنت بخاف وأنا صغير لكن حاليا عادي ممكن أكتب عن أي حاجة.
إيه هو حلمك وهل حققت منه حاجة ولا لا؟
كان حلمي وأنا عندي ١٧ سنة أول ما بدأت في أدب الرعب إني أوصل لمعرض الكتاب والحمدلله الحلم إتحقق.
ازاي وصلت ل معرض الكتاب فى فترة قصيرة؟
في البداية من ٢٠٢٠ بعد ما كتبت رواياتي الثلاثة حبيت أعمل فكرة إني إزاي اتكلم عن أحداث حقيقية مرعبة، وقتها جت في دماغي فكرة البحث عن مقالات لناس اتعرضوا لمواقف أو أحداث حقيقية حصلت، زي جرايم متعلقة بالدجل والشعوذة أو أحداث ليها علاقة بكتب غامضة أو سحر، لكن مع الوقت كل ده بدأت اطوره واحدة واحدة، وهي إني إزاي اقدر أكتب ملف رعب، ولكن بطريقة درامية شوية بحيث أخف الضغط من علي القارئ وفي نفس الوقت كإني بحكي حدوتة عادي، جت في بالي فكرة إني أعمل كتاب عن أحداث حقيقية، فضلت في كتابته حوالي سنة، حاليا وصلت ل ١١٥ ملف والكتاب كان رابع أعمالي الأدبية، واللي هفضل اعتز بيها طول حياتي لإنه غالي عندي جدا، كانت بمثابة قصة جميلة بالنسبالي، وبمجرد التعاقد علي كتابي قولت إني أنهيت القصة حسيت وقتها إني فعلا كنت بكتب قصة جميلة عن حياتي، دام تعبها لأربع سنين، وفضلت ورا حلمي والبركة في ربنا ثم أهلي وحماس صحابي الشباب اللي فضلوا معايا لحد أخر لحظة.
إيه هو أقرب كتاب لقلبك وليه؟
رواية نادر فودة ٥ لأحمد يونس وكتاب شخصيات غامضة حيرت العلماء ٢ لمنصور عبد الحكيم، لإن دول جبتهم من معرض ٢٠٢٠ وكل ما كنت بقرأهم كنت بحس بحاجة إيجابية جوايا إن في يوم من الأيام كتابي هيكون جنبهم في اوضتي.
مين هو مثلك الأعلى؟
أحمد يونس.
إيه هي المقولة اللي مؤمن بيها ف حياتك؟
الخسارة لا تعني النهاية.
إيه اللي اتغير فيك من البدايه لخد اللحظة دي؟
أعتقد إن مفيش غير بعض الحاجات، زي النضج وإن كل يوم تفكيري بيتغير ونظرتي بتختلف يوم عن يوم أول ما بدأت في الأدب ده. لكنن اللي اتغير فيا هو قلبي.
ازاي اتغير قلبك؟
إني حبيت شخص وكان بالنسبالي كل حاجة وكان بيدعمني كتير جدا ولكن خذلني وبعد عني بدون سبب وآخر كلمة قالهالي دوس في مستقبلك وانساني، لولا كلمته كان زماني بعدت عن كل حاجة، لإني فعلا كنت هبطل كل حاجة، لكن قالي دوس في مستقبلك، طلع عنده حق، دوست في مستقبلي ونسيته. أتمني إنه ميرجعش لحياتي تاني كفاية اللي حصلي بسببه.
مين كان يدعمك فى مشوارك؟
أهلي وصحابي هما الداعم الرئيسي.
هل عندك نصيحة تحب تقديمها للشباب اللي بتهتم بالكتابة؟
نصيحتي ليهم إنك تقدر توصل لحلمك بشرط واحد بس إنك تكون محدد هدفك وعايز توصل لإيه بالظبط، وتحاول تشوف نقاط ضعفك وتشتغل عليها كويس ومتسمعش لأي كلام سلبي يتقالك خليك دايما واثق إنك تقدر تغير العالم من خلال قلمك اللي بتكتب بيه.
✍️ رحمة عبد العليم
#عبثيون #3abthion #عبثيون_العصر_الحالي
تعليقات
إرسال تعليق
متنساش تشاركنا برأيك