حوار بعنوان اكتشاف موهبة من قاع الحزن مع عاشقة نوفمبر "داليا موسى"
إنسانة عادية جدا وحياتي هادية، لكن في يوم من الأيام اتقلبت حياتي، بحس إن وراء كل حاجة حزينة حاجة حلوة تفرح قلبك يعني ... أنا مثلا كنت زعلانة ومخنوقة ومن هنا بدأت أكتب وبدأت مواهبتي تظهر كنت فرحانة بنفسي وفخورة جدا ومازلت ... نفسي أكون كاتبة عظيمة مش أي حاجة وخلاص ... نفسي أعمل كتاب خاص أتكلم فيه عن فلسطين ... وأعمل كتاب اعالج فيه مشاكل التنمر والحاجات المؤذية اللي بدمرنا من جوه.
دا كان تعريف محاورتنا "داليا موسى" صاحبة ال 17 عام لنفسها
▪️ بتكتبي من امتى وازاى عرفتي إن عندك موهبة الكتابة؟
من 2021 يعني من 4 سنين تقريبًا ... زي ما قولتلك حصل معايا موقف زعلني جامد، فبدأت أكتب وأنا بعيط ومن هنا عرفت مواهبتي، ربنا بيدينا حاجات حلوة كتير بس إحنا اللي مش حاسين بيها ... بقيت أي حاجة تزعلني أكتبها على الورق، وبقي قلمي صديقي العزيز والدفتر هو روحي هما ساعدوني كتيرر أوي.
▪️ ممكن تقولي إيه الموقف دا؟
كنت تقريبًا في أولى ثانوي، ف كان فيه إمتحانات شهرية أكيد في المدرسة أنا جبت 18 ونص من عشرين، كان إمتحان الفقه، اتخنقت جامد عشان ده مش مستوايا، وفضلت اعيط جامد أوى وقتها عشان درجاتي مكنتش حلوة، وحسيت إني بقيت إنسانة فاشلة أوي، كان يوم صعب عليا وخوفت بابا يزعل مني. فكتب وقتها الخاطرة دي.
"ما بكِ أيتها الحياة؟ لماذا لم تقفِ بجانبي فى أوقات ضعفي؟ لماذا لم تحذريني من هذا الواقع؟ مابكِ أنا أراكِ صديقتي وأنتِ تغدرين بي لماذا لم أعد ذلك الإنسان الذي كنتِ تحبينه؟ أم صرت ضعيف؟ أجيبيني أين عدالتك أيتها الحياة أين؟".
كنت حاسه إن الدنيا كلها كانت جايا عليا، عشان أنا تبعت وفضلت أذاكر كتير ومكنتش بعمل أي حاجة أيام الدراسة خالص، وخايفة أضيع تعب بابا وماما، بس الحمدلله على كل حال ... ومن هنا لقيت نفسي بكتب وخرج كل الجوايا أي حاجه تحصل معايا كنت بكتبها، كانت صديقي في أوقات كتير حتى لما كنت بزعل من أقرب الناس ليا، كنت بلجأ للكتابة، كنت بحسها بتحتويني.
بشكر ربنا على النعمة دي وبحمده والله أنه ميزني بالموهبة دي، وطورت نفسي لحد ما بقيت اللي عليه دلوقتي بفضله وكرمه مش بمجهودي أبدا.
▪️ مين اللي وقف جمبك وشجعك من بدايتك لحد دلوقتي؟
أهلي أكيد كانوا بيدعموني ديما، وأصدقائي ومعلميني الأعزاء، وكاتبتي المفضلة مروة، وكتير من الناس كانوا بيدعموني بالكلماتهم الجميلة، بكون مبسوطة جدا بدعمهم ليا، وأنا حابة أشكرهم جدا من قلبي.
▪️ فنون الكتابة مختلفة ومتنوعة، إيه أكتر فن بتحبي تكتبه؟
الخواطر، بحس أنه أقرب للقلب، وبحب فكرة إنك تطلعي كل اللي جواكي على شكل نص جميل مُزين بالكلمات الجميلة. والخواطر فن سلسل وممتع وجميل، أنا بحب الخواطر، مع العلم إن كل فنون الكتابة جميلة جدا، يكفي إنه علم ونعمة من عند الله، والقلم شي عظيم جدا لأبعد الحدود، بس هي ذوقيات وأراء.
▪️ مين كاتبك أو كاتبتك المفضلة ؟
الدكتور أحمد خالد توفيق، كتباته عميقة جدا واقعية ومش من وحي الخيال، ومن أجمل ما قرات له ما وراء الطبيعة. ومن أقرب نصوصه لقلبي "لست من أولئك الحمقى الذين يمتنعون عن الأكل عندما تسوء الأمور، لا ذنب لمعدتي البريئة بما يدور في العالم الخارجي". النص دا كلامه بجد عظمة.
ومحمود درويش بحسه قريب أوي لقلبي، كتابته بتخطف قلبي والله بحلم أوصل للفكر بتاعه، وإنه من أهم الشعراء الفلسطينيين والعرب، أكتر حاجة بحبها في أقواله إنه يمتزج بحب الوطن، أعشق عندما قال عن الوطن: "ما هو الوطن؟ هو الشوق إلى الموت من أجل أن تعيد الحق والأرض، ليس الوطن أرضًا، ولكنه الأرض والحق معًا، الحق معك، والأرض معهم. لم نعد نعلم من الذي هاجر، نحن أم الوطن".
وكمان الكاتبة المفضلة عندي هي مروة مصطفى، زهرة قلبي، كانت تمثل الدعم الأكبر ليا، وهي اللي خطوت معها أول خطواتي نحو الكتابة، تعثرت فقدمت لي يداها لأقف، ليس لهذه أنا جعلتها كتابتي المفضلة بل لانها تستحق، وجميع كلماتها أكثر من رائعة.
بعض مما عندها "فِي إِحدَىٰ لَيَالِي نُوڤَمْبِر البَارِدة، ومَع هُطُولِ الأمطَارِ، كَانَ يَتَجولُ في الطُرُقَاتِ وحَول الأشجَارِ وفِي سَلاتِ المُهْمَلاتِ؛ بَاحِثًا عَنْ فُتاتٍ مِن الطَّعامِ مِمَّا فَاضَ عَن حَاجَةِ العَالمِ ليأكُله، لَرُبَما هَدئتْ مَعِدَته الصَّغِيرة وكَفَاهَا ذَاكَ الفُتات عَنْ الأَلَمِ والجُوعِ. كَان ذَا ثوبٍ ممزقٍ ودُون حذاء، كَسَتهُ مِيَاهُ الأَمْطَارِ حَتىٰ كَادَ يَتَجَمدُ مِن أَلَم البَردِ القَارس ولَيَالِي الشِّتَاء القَاسِية، وكَان لَايَزال يَتسَاءلُ مُتَعَجِّبًا: يَاتُرىٰ كَيفَ يَكُون شُعُور الطِّفلِ الَّذِي يَنَامُ فُي هَذا البَردِ وَسَط عَائِلَته، وبَيْنَ أَحْضَانِ أُمِّهِ وهِي تُطْعِمهُ أَكْلَتَه المُفَضَلة؟ كَيفَ يَكُونُ شُعُورهُ وهُوَ يَذْهَبُ إلَىٰ المَدرَسَةِ كُلّ يَومٍ، ويَلْعَبُ مَع أَصْحَابِه؟ مَاذَا يَحْتَاجُ أَكْثَر مِن ذَلِكَ؟ أَشْرَقَتْ شَمْسُ صَبَاحِه؛ لِيَبْدَأَ يَومَه بَيْنَ عَائِلَتِه دَافِئًا هَانِئًا، أَمَّا أَنَا فَتُركتُ هُنَا لَا أَعْرِفُ مَتىٰ سَتُشْرِق شَمْسِي وأَعُود إِلىٰ دِيَارِي، وأَلْعَب بَيْنَ عَائِلَتِي وأَقْرَانِي".
▪️ إيه أكتر حاجة فخورة إنك عملتها؟
أنا فخورة بنفسي جدا وباللي وصلتله، وإني بدأت أخطو خطوات أسرع، بدأت أشترك في كتب وحاليا بكتب رواية ... وإني وصلت لجزء كبير من تحقيق حلمي، دخلت في كتاب مع كيان نصوص عظيمة، الكيان ده حقيقي أنا بحبه وأتعلمت فيه حاجات كتير فدتني، غير إن مستويا تطور وأفكاري وحبي للكتابه بيكبر، أنا فخورة بنفسي وبحمد ربنا على اللي أنا فيه دلوقتي.
▪️ كلمنا عن كيان نصوص عظيمة
دخلته وأنا عندي 14 سنه كنت صغيرة شويه وقتها، دخلته عن طريق صحبتي مروة اللي قولتلك عنها كتبتي المفضلة، كانت بتنشر خواطر ومرة اشتركت في كتاب وفازت، كنت بشجعها وبحب أقرأ والكلام دا، هنا بدأت علاقتي بالكيان من 2021 ابتديت أكتب بس مكنش عندي ثقة في نفسي مكنتش بنشر حاجه، أول مرة اشتركت في مسابقة إيدي كانت بترعش وأنا بشترك.
بيحمسني الكيان أوي بحب وجودي وبحمد ربنا إني جزء من كيان نصوص عظيمة، أنا حرفيا اتعلمت حاجات كتير، وكانوا بيدعموني في الدرسة غير الكتابة، كانوا معايا في تالتة ثانوي خطوة بخطوة. بيحمسنا وبيدعمنا اوي وبنتعمل مع بعض كأسرة، الفكرة أصلا بتاعت تأسيس الكيان جميلة عارفه ليه؟ عشان معتمدة على التعاون بينا والمحبه والود.
▪️ إيه أكتر تعليق سمعته من حد وأثر فيكي؟
كتير، لما كانوا يندهوني في المدرسة الكاتبة "داليا" كنت بحب اسمع ده منهم، وفي كل مكان كنت بحس بفخر جامد وقتها. أكتر تعليق لما واحدة أعرفها كنت كاتبة تحت بوست من كتاباتي منتظرة أراءكم، قالتلي انتي مش محتاجه رأي حد كتاباتك روعه أصلا، وفي مرة واحدة صحبتي كانت كتبالي بحب كتاباتك أوي يا داليا، بتأثر فيا جامد وكدا، وكنت باخدها اسكرين وقرأها كل شوية كنت هعيط من الفرحة، بحب الحظات دي أوي، وكتير من التعليقات.
▪️ إيه المشاكل اللي واجهتك في حياتك ك كاتبة و وتعاملاتي معاها ازاي؟
فقدان الشغف، ووجود أشخاص في المجتمع عايزا تحطم ثقتنا في أنفسنا، تغلبت عليها بعدم السماح لحد بتحطيم ثقتي بنفسي، فأنا مؤمنة بموهبتي جدا، والتأقلم مع فقدان الشغف، وتعلم الثقة بالنفس ... كنت واثقة في ربنا جدا، ودي أهم حاجة عشان تتغلبي على فقدان الشغف وتتعافي من الناس اللي بتحطمك، لازم تكوني أول حاجة مع ربنا، كنت بيأس والله بجد وبفضل أعيط، أنا ساعات بحس إن الكتابة لعنة عارفة ليه ؟ كنت بحس كل ما حد بيجرحني بكلام ألاقي موضوع أتكلم عنه، كنت بكتب اللي بحس بيه ودا ساعدني عشان اطور من نفسي، اكتشفت إن الكاتب لازم يمر بمواقف صعبة ويتعلم منها، الدنيا مش بتقف على نقطة سودة لازم نغير الإسود لأبيض أو نستفاد من الإسود، أنا كنت بستفاد ومازلت، كنت بتدمر نفسيا ومازلت، بس كنت بكتب خواطر جميلة جدا، أهم حاجة يكون عندك عزيمة وطموح، اللي عنده هدف مش هيهمه فقدان الشغف والكلام الفاضي صدقيني، واسعى لما الانسان يسعى عشان يطور نفسه ربنا بيكرمه، حقيقي أهم حاجة الإرادة والعزيمة، مش في الكتابة بس في أي حاجه نفسك تحققيها في المستقبل. والاستمرار شي مهم برده، كنت بقرأ كتير جدا عشان أكون حصينه لغوية، الموضوع كان صعب بس كان ممتع في نفس الوقت، الأهم من النجاح التعب والسعي والإجتهاد، بتحسي بمتعة رهيبة وفرحة لما تحققي حاجه بمجهودك.
▪️ ازاي بتطور من نفسك؟
بقرأ كتير، وبحاول أجمع معلومات عن الموضوع اللي بتكلم عنه على قدر الإمكان، وبحاول أتعلم من أخطائي برده.
▪️ في حالة معينة بتحب تكتب فيها؟
لما بكون حزينه بحب أكتب اوي.
▪️ إيه هو حلمك اللي بتسعي لتحقيقه؟
إني أكون كاتبة جيدة لأبعد الحدود ... أنشر رواياتي اللي محتفظ بها في مدوناتي ... إن خواطري توصل إلى العالم كله ... يبقى ليا كتاب فردي خاص بي ... أكتب كتاب عن الإسلام وفلسطين ... أثبت للعالم إني أمتلك مواهبة الكتابة لأني أمتلك الإرادة.
▪️ في نهاية حوارنا إيه هي النصيحة اللي تقولها لحد عايز يبدأ في المجال الكتابة
خليك وثق في ربنا ثم في نفسك، وحط قدام عنيك هدف وأسعى عشانه، وأكيد ربنا هيكرمك، بس أنت أجتهد وأهتم بتحسين اللغة، والإستمرارية. أهتم بموهبتك وحافظ عليها، هي هدية من ربنا ليك، خليك قد المسؤولية والسعى ثم السعي بس، ربنا يكرمنا جميعا يارب.
جميل جدا ما شاء الله ♥️♥️
ردحذفربنا يوفقك 🤍
ردحذفلطيفة 💕
ردحذف