ودع زنقة الامتحانات: خطط بذكاء واتخلص من ضغط ليلة الامتحان

زنقة الامتحانات … الكابوس المتكرر في حياة كل طالب.

بمجرد ما يبدأ موسم الامتحانات – أو حتى مجرد م يقرب – بندخل في دوامة مألوفة: تسويف، توتر، سباق مع الزمن، ومذاكرة متأخرة جدًا.

نأجل ونأجل لحد ليلة الامتحان، ونحاول نضغط كمية مهولة من المعلومات في وقت ضيق جدًا … بس هل فعلاً الطريقة دي بتجيب نتيجة؟ ولا مجرد محاولة يائسة للبقاء على قيد الحياة؟

هو إحنا ليه بنأجل المذاكرة أصلًا؟

الأسباب كتيرة ومختلفة، اهمها:

الخوف من حجم المنهج: لما نحس إن المحتوى ضخم، بيجي لنا إحباط، ونبدأ نهرب من المذاكرة.

الاعتماد على التوتر كحافز: في بعض الناس عندهم اعتقاد إنهم يشتغلوا أحسن تحت الضغط، وده مش دايمًا حقيقي.

المشتتات اليومية: من السوشيال ميديا للمسلسلات والأفلام لخروجة أو قعدة حلوة مع الصحاب، حياتنا مليانة مغريات كتيرة بتسرق وقتنا من غير ما نحس.

إزاي ممكن تتجنب زنقة الامتحانات؟

في حلول بسيطة وفعالة ممكن تخرجك من الدوامة دي:

1. التخطيط:

اعمل جدول واقعي للمذاكرة تقسم فيه تقسيم المواد على أيام محددة، ميبقاش كله في يوم واحد.

2. تقنية الطماطم (Pomodoro):

وهي عبارة عن إنك تذاكر لوقت محدد وبعدين تاخد استراحة قصيرة وترجع تكمل تاني، ودا هيساعدك في تحسين التركيز ومنع الإرهاق.

3. المراجعة المستمرة:

متستناش ليلة الامتحان عشان تراجع، خصص وقت أسبوعي للمراجعة، عشان متتراكمش عليك المعلومات.

4. التحفيز الذاتي:

كافئ نفسك بعد كل إنجاز بسيط، حتى لو بحاجات بسيطة تحفزك تكمل.

5. التقليل من المشتتات:

في برامج ممكن تساعدك في إنك تقليل وقتك على السوشيال ميديا، زي التطبيقات اللي بتحدد وقت استخدام الموبايل.

افتكر دايما إن المذاكرة مش ماراثون بيبدأ قبل الامتحان بيوم ... ابدأ النهاردة، نظم وقتك، وذاكر بذكاء بدل ما تزنق نفسك تحت ضغط ... ابدأ من دلوقتي وخلي الامتحانات فرصتك تتألق مش تتوتر.

جاهز تبدأ من النهارده؟ شاركنا في التعليقات بخطتك للمذاكرة، يمكن حد يستفيد ويتحفذ من كلامك 

كتابة: 𝓑𝓜𝓓