تجرأ أن تحب نفسك كما هي

كتير مننا عنده مشكلة فى تقدير الذات وده بيخلينا نتقبل حاجات أقل من اللي نستحقها، سواء كان شغل أو صحاب أو شريك حياة، وده بيخلينا نعاني بأشكال كتيرة في حياتنا. "الزهرة التي تنبت فى غير أرضها تذبل"، مش هتقدر تثبت نفسك وتلمع غير فى الشغل المناسب، مش هتلاقي سند غير من الصحاب الحقيقية الي تستاهلها، مش هترتاح وتستقر نفسيا وتطمن غير مع الشريك المناسب ليك وحاسس إنه شبهك وبيقدرك وتقدره. 

غير كده هتعاني فى حياتك وتحس إنك مستنزف نفسيا، في المقال ده هقولكم على كام طريقة تتقبلوا بيها نفسكم، وتحطوا حدود شخصية تحميكم من الناس التوكسيك وتقدروها بالطريقة الي تستحقها. 

 ازاي تحب نفسك: 

 الأول لازم تعرف إنك مميز زي ما أنت من غير ماتقدم أي حاجة لأي حد، مميز بعثراتك وعيوبك وأفكارك من غير ماتتغير عشان تعجب أي حد. خليك متأكد إن نفسك مش مستنية الحب من أي حد غيرك أنت. 

مهما خدت حب من اللي حواليك دايما هتحس بالتهديد، إن لو حد منهم بعد عنك هتتأثر جامد من بعده، لكن لو حبيت نفسك وقدمتلها الدعم اللي تستحقه بنفسك مش هيفرق معاك شقلبه أي حد تاني حواليك، لأنك عندك إكتفاء ذاتي، لازم تتعلم مهارة مغازلة الذات هتساعدك تقدم الدعم لنفسك وتعلي ثقتك بنفسك.

ازاي تعلي إستحقاقيتك:

 زي مأنت شايف نفسك الناس هتشوفك، خليك متأكد إن نظرتك لنفسك وتقديرك ليها بتنعكس عليك غصب عنك، لو شايف نفسك تستاهل كل حاجة محدش هيستخسر فيك حاجة، لو حسيت إنك ملك كل الناس هتعاملك على هذا الأساس، لو حسيتي نفسك ملكة جمال محدش هيقدر يلاحظ عيوبك، عشان كده لازم تركز أنت بتقول لنفسك إيه كل يوم وشايفها فين في المستقبل، وشايفها تستاهل إيه لأن ده هينعكس على كل اللي حواليك وهيقدروك على هذا الأساس.

ازاي تقدم الدعم لنفسك: 

أتعلم تقول "لأ" للحاجة اللي مش هتفيدك ولا هتأثر عليك غير بالسلب، متجيش على نفسك عشان ترضي حد قدرها هي أولى، إعترف بإنجازاتك اللي عملتها حتى لو صغيره، لأن ده بيزود ثقتك بنفسك وبيشجعها تطور أكتر، أوعى تقارن نفسك بأي حد، مهما كان ناجح أو جميل أو سعيد. 

ربنا موزع علينا ال24 قيراط بالتساوي بس كل واحد واخدهم بطريقة مختلفة ودي حكمة ربنا، بطل تجلد ذاتك وأدعمها عشان تبقى أحسن، خصص دايما وقت ممتع ليك لوحدك، لأن ده بيزود طاقتك الإجابية وبيفرق فى نفسيتك كتير.

ازاي تبني حدودك النفسية وتحافظ عليها: 

خليك عارف إن الحدود النفسية بتكون مع أقرب الناس ليك قبل الغريب، وهي مش زي ما الناس بتفكر إنها حاجز بينك وبينهم، بالعكس هي حاجة بتحميك نفسيا وبتوفرلك مساحة شخصية ومساحة أمان، ومحدش بيعترض عليها ولا بيزعل غير اللي ناوي يتعداها ويأذيك. 

في شخصيات بتحب تمارس الابتزاز العاطفي، وأنت بتكون مش مستوعب ده وقتها وبتيجي على نفسك عشان ترضيهم، وعشان كده لازم تبني حدود، وأول حد ملزم بإحترامها هو أنت.

 متخليش حد يتعدى حدوده معاك، يتكلم عن شكلك ولا شخصيتك ولا أي حاجة تخصك بهدف الهزار، متخليش حد يتعدى على مساحتك الشخصية ويخططلك حياتك، متخليش حد يستغلك ماديا أو معنويا أو بأي شكل بالإبتزاز العاطفي. 

متقبلش بحاجة أقل من اللي تستحقها عشان خاطر خايف على مشاعر حد، خاف على مشاعرك أنت أولى عشان مع الوقت هتكتشف إنك مش قادر حتى تدي نفسك الطاقة دي واستنزفتها في حاجات متستاهلش.

في نهاية المقال أحب أوضح إن مش معنى انك تحب نفسك يبقى متشتغلش عليها وتساعدها تطور وتبدل العادات السيئة بعادات مفيدة وصحية ، بس الفكرة انك تبقى عارف ومتأكد إن قيمتك مش بتتقاس بالي بتقدمه أنت مولود عندك قيمة ومحدش يقدر ينكرها أو يسلبها منك تحت أي مسمى، وخليك عارف إن ده مش بيحصل فى يوم وليلة التغيير بياخد وقت .

ممستنية رأيكم وتعليقاتكم، ولو حد محتاج مساعدة أو استفسار يبعتلي على الأكونت الشخصي، برد على كل الناس.

rahma.abdelalem.1