بين أنا ونحن: هل تعيش لنفسك أم للكل؟ _ ثاني مقالات فضائي آلي

مرحباً بيك يا صديقي الصدوق

واهلاً وسهلاً بيك في سؤال جديد من أسئلة الساعة 1 بالليل، داسؤال معقد حبتين تلاتة كده وغتت

السؤال هو:

"هل انت عايش عشان (نحن)؟ ولا عشان (أنا)؟!"

بص يا نجم، في عالم مليان بالبشر والكائنات الحية وغير الحية، فيه دايمًا عالمين بيتصارعوا جوانا: عالم الـ"أنا" وعالم الـ"نحن"

وساعات بنلاقي نفسنا رايحين جايين ما بين الاتنين، وساعات بنقع في حفرة منهم ونسكن فيها سنين!

تعالى نبدأ بعالم الـ"أنا"

يعني الشخص اللي دايمًا شايف نفسه بس، بيعيش لوحده، بيشوف بعينه، وبيسمع صوته بس. وده مش دايما غلط ولا صح على طول الخط، بس خليني أقولك كده شوية حاجات عنه تعرفك لو أنت تكون منه :

أنا بعيش لوحدي

مش شرط تكون فعلاً قاعد لوحدك، لكن دماغك مقفولة زي باب شقة مفيهاش جرس، محدش بيخشها، ولا حد بيعرف يكلّمك جوه دماغك.

محدش بيفهمني

لأنك ببساطة مش بتدي فرصة لحد يفهمك. بتتكلم؟ آه، بس بلغة مش مفهومة، أو يمكن أنت اللي مش سامع رد الناس من كتر ما صوتك عالي جواك.

محدش بيقدرني

ممكن لأنك متوقع كتير، أو لأنك شايف اللي بتعمله حاجة عظيمة بس محدش حس بيها زيك، لأنك ما شرحتش، أو لأنهم ببساطة شايفينها عادي ... وده طبيعي!

لأن أمر طبيعي جدا تعمل حاجة مش مفهومة، أو حاجة مش كتير يحبوها، لأن صوابعك مش زي بعضها والناس ازواق. 

هعمل الشغل لوحدي

خوفًا من الفشل، من الرفض، من الانتقاد ... ف بتختار الوحدة على المغامرة. بس الوحدة يا صاحبي مرهقة أكتر من أي مغامرة.

أنا الأفضل

ساعات بتكون درع نفسي ضد التحطيم، وساعات بتكون فعلاً شايف نفسك كده بعد ما عملت حاجة حلوة، بس لو فضلت جوه الفقاعة دي ... مش هتشوف غير نفسك بس، وهتضيع كتير. وممكن تقف وتعطل ومتبقاش إنجازاتك زي الأول.

طيب والنتيجة؟

• لو أنت شخص واقعي: هتنجز شوية حاجات بسيطة، بس غالباً مش هتأثر في اللي حواليك. 

• لو أنت خيالي شوية: هتعيش في عالم موازي، كله أوهام وإنجازات وهمية، وفي الآخر ... تكتشف إنك لوحدك. 

نقلب الصفحة بقى وندخل على عالم "نحن"

نحن نعيش معًا

الناس اللي في العالم ده بيحسوا ببعض، بيتكلموا، يتحاوروا، يتخانقوا ويتصالحوا، بس دايمًا في دايرة فيها دفء وفيها مشاركة.

نحن متفاهمون

يعني مش لازم نفهم بعض من أول كلمة، بس بنحاول نوصل لنقطة التقاء ... كل واحد فينا يبني حيطة، نركبهم على بعض نعمل بيت!

نحن مقدرون

كل حد شايف مجهود التاني، حاسس بتعبه، مش بينكر جميله ... لأننا بنبني مع بعض، فـ عمر ما حد هيغفل تعب التاني.

هننجز ده سوا

مفيش "أنا أخلص وأنتوا اتفرجوا"... كلنا شغالين، كلنا بنكمل بعض.

نكسب سوا أو نخسر سوا

دي الروح اللي بتخلي الفريق فريق، حتى لو وقعنا، بنقوم تاني عشان لسة عندنا اللي نحققه.

عندنا لسة كتير نعمله

دايمًا في طموح، في تطوير، في دفع للأمام. بس الفرق هنا إنك مش لوحدك، اللي حواليك بيشجعوك وبيحمّسوك ويحمّلوك على أكتافهم لو تعبت.

والنتيجة هنا؟

• لو الشخص واقعي: يحقق إنجازات حقيقية وثابتة، ليه صدى في العالم. 
• لو الشخص خيالي شوية: يحقق حاجات حلوة حتى لو صغيرة، بس فيه أمل إنها تكبر وتعيش. 

الخلاصة

أنت صاحب القرار، وأنت اللي بتحدد مكانك. 

هتعيش لوحدك؟ طوّر من نفسك. 

هتعيش وسط الناس؟ اختار مين يكون معاك وطوّرهم كمان. 

في كل الحالات، أنت مش غلطان ...

لكن دايمًا تقدر تختار تبقى أحسن.

كتابة وتصميم: AEMO

متنساش تقرأ أول مقالات فضائي آلي 🪐 🤖 

ليه أنا دايمًا الغلطان؟! - اعرف الحقيقة وخلّي بالك من رد فعلك