صحّي شغفك اللي نام: جِه الوقت نبدأ من تاني

صباح الخير أو مساء الخير على حسب الوقت اللي بتقرأ فيه الكلام دا. 

أخبارك إيه؟ أتمنى تكون بخير، وأتمنى كمان تكون في طريقك ترجع لحلمك اللي نام جوه قلبك من كتر التأجيل!

رمضان خلص، والعيد خلص، واتزنقنا في الميدترم، وشوية وندخل على الفاينال، ومش بعيد نلاقي السنة كلها خلصت من غير ما نحس. فـ مش جِه الوقت اللي نقف فيه لحظة مع نفسنا ونقرر نرجع نمسك زمام حياتنا من تاني؟

لو أنت طالب أو خريج ...

لو أنت طالب، فأنت أكيد عارف الضغط اللي جاي. ولو خريج فالمعارك مختلفة، ما بين شغل، ودوامة الروتين، ومحاولة تظبيط الحياة بعد رمضان. كلنا بنعافرفي معركتنا الخاصة، بس فيه فئة مننا، فقدت الحماس، وسابت الحاجات تتراكم، وكل يوم تقول "بكره".

بس بكره إمتى؟ وليه لأ دلوقتي؟

ليه نستنى اللحظة "المثالية"؟ ليه نربط البداية بظروف معينة أو شعور معين؟ 

عايزا أقولك إن "البداية مش لازم تكون مثالية". مش لازم تبقى جاهز 100%. المهم تبدأ. وصدقني، "It's never too late".

الخوف من الخروج من منطقة الراحة

أنت مش خايف من الفشل، أنت غالبًا مش عايز تسيب ال Comfort zone أو منطقة الراحة، مش عايز تـ risk، مستني تبقى جاهز!

بس لو فضلت مستني، إيه اللي هيحصل؟ ولا حاجة ...

أما لو بدأت؟ هتكتشف، هتتعلم، ويمكن توصل لحاجة عمرك ما تخيلت إنك تقدر توصلها.

التجربة عمرها ما تكون خسارة

جرب، لو صابت فكويس جدًا ممتاز، ولو خابت فأنت كسبت خبرة ومحاولة، واتعلمت من الخطأ اللي وقعت فيه. لكن لو ما جربتش، فأنت خسرت الفرصة وخسرت التجربة.

اوعى تنتقد نفسك زيادة عن اللزوم

كفاية جلد ذات، وكلام سلبي لنفسك، وكفاية إنك تسمع لكل صوت بيحبطك. خد النقد من اللي قلبه عليك، اللي بيقولك على عيوبك بحب وصدق عشان خايف عليك، مش عشان يطلعك وحش وخلاص. فلتر الكلام، واسمع اللي تستفاد منه وابدأ اشتغل عليه لنفسك، مش علشان حد.

قرار صغير = بداية تغيير كبير

مش لازم تبدأ بحاجة ضخمة، خُد خطوة صغيرة، قرار بسيط، عادة صغيرة تلتزم بيها، ومع الوقت هتكون البداية الحقيقية للتغيير.

أنا مش بجلدك، أنا واحدة زيك تمامًا، وكل الكلام دا بوجهه لنفسي قبلك، بس حبيت أشاركك يمكن تكون محتاج تسمعه، ويمكن نشجع بعض ونبدأ سوا.

يلا نبدأ سوا بخطوة بسيطة!

سيب كومنت تشاركنا به بالقرار الصغير اللي أخدته عشان تصحي بيه شغفك، وابعت لنا على إنستجرام لو حابب تشارك معانا في تحدي "رجّع النبض"، وخلينا نشجع بعض عليه لحد ما يتحول لعادة!

3abthion's Instagram

كتابة BMD

تصميم:AEMO