ازاي تصحي شغفك بعدما انطفيت؟

أحيانًا بنمرّ بمرحلة من الفتور، الانطفاء، أو بنحس إن الحماس بيقل ...

كل دي تعبيرات عن حالة فقدان الشغف اللي بقت شبه لغة مشتركة حوالينا.
كل مرة أكلم حد يقول لي: "أنا فاقد الشغف"، أو "نفسيتي مش أحسن حاجة"، وكأننا كلنا في دوامة مش قادرين نخرج منها.

بس الحقيقة؟
فقدان الشغف مش معناه النهاية.
الطريق مكمل، ولو استسلمنا بس، ساعتها تبقى النهاية فعلاً.
أما لو قررنا نكمل ونحاول نرجع لأنفسنا، فاستعادة الشغف ممكن تبقى واحدة من أجمل وأمتع الرحلات اللي هتمر بيها في حياتك.

النهاردة جايالك بخطوات عملية وبسيطة، لو خدت منها حتى خطوة واحدة، هتلاقي الحماس بيرجع ينور حياتك من جديد.

خطوات استعادة الشغف:

1. اعرف نفسك من جديد

خد وقتك وفكر:

• إيه الحاجات اللي بتحبها بجد؟

• إيه الهوايات اللي كانت بتخليك مبسوط؟

• إيه المهارات اللي بتحب تمارسها حتى لو بدون مقابل؟

ارجع لنفسك القديمة.
افتح دفتر أحلامك اللي كنت نسيته.
حتى لو الأهداف دلوقتي باينة بعيدة، بس مجرد التفكير فيها هيبث جواك طاقة وإلهام تتحرك بيه ولو بخطوات صغيرة.

2. التحدي والتجديد

الشغف أوقات بيصحى لما تدخل حياتك حاجة جديدة.
جرب تتعلم مهارة جديدة، أو تزور مكان أول مرة تروحه، أو حتى تقرأ كتاب في مجال ما كنتش تعرفه.

ادخل تحدي بسيط مع نفسك:

• اتعلم لغة جديدة.

• جرب هواية بسيطة زي الزراعة أو التصوير.

• استكشف مجال مهني جديد.

التجربة بتولد شرارة الشغف من حيث لا تدري.

3. خد خطوات صغيرة (Baby Steps)

ما تستناش لما الحماس يرجع ١٠٠٪ عشان تبدأ، زي م قلنا قبل كدا مفيش وقت مناسب، ومش لازم تكون جاهز
ابدأ بخطوة صغيرة جدًا، حتى لو كانت دقيقة واحدة يوميًا.

مثلاً:

• كتابة سطرين في دفتر يومياتك.

• رسم رسمة بسيطة.

• عمل تمرين رياضي خفيف.

الخطوات الصغيرة مع الوقت بتعمل فرق ضخم أكتر مما تتخيل ... خطوة صغيرة مع خطوة صغيرة هتوصل لهدفك.

4. ابني بيئة إيجابية حواليك

قضي وقت مع ناس ملهمة ... ناس طاقتها حلوة ومليانة شغف.
الطاقة دي بتتنقل زي العدوى الجميلة.

سواء كان مع أصدقاء حقيقيين أو حتى تتابع ناس إيجابيين أونلاين، حاول تحيط نفسك باللي يرفعوك لفوق مش اللي يسحبوك لتحت ويعلقوك في حالة الفتور.

5. كسر الروتين

الروتين ممكن يكون قاتل للشغف ... جرب تكسر روتينك اليومي ولو بحاجات صغيرة:

• غير طريقك المعتاد للبيت.

• غير ترتيب غرفتك.

• خصص وقت لتمارين رياضية أو رياضة تحبها زي المشي أو اليوجا.

كمان، الاهتمام بجسمك (رياضة خفيفة + غذاء صحي + نوم كفاية) بيأثر مباشرة على حالتك النفسية ويعيد ضخ الطاقة فيك.

6. عن تجربة شخصية

التطوع ومساعدة الآخرين ...  من أقوى الحاجات اللي هترجع الشغف جواك: مساعدة الآخرين بدون انتظار مقابل. التطوع بيخلق جواك إحساس عميق بالهدف والمعنى ... بتحس إنك ليك قيمة حقيقية، وإنك مش لوحدك، وإنك بتسيب أثر جميل.

كمان، الكتابة أو التدوين ... دى وسيلة عظيمة تكتشف بيها نفسك من جديد ... أوقات التعبير عن مشاعرك وأفكارك بالكلمات بيحررك، وبيخليك تشوف جوانب منك ما كنتش واخد بالك منها ... هيكون لينا مقالة خاصة عن التدوين، لو مستعجلين عليها أوي قولوا في الكومنتات أو ابعتولنا على صفحاتنا.

الأهم من كل دا: الصبر ... رحلة استعادة الشغف طويلة وهتاخد وقت، مش هتصحى شغفك في يوم وليلة، مش بضغطة زر هتلاقي هماسك رجعلك ... خد وقتك في كل خطوة متضغطتش على نفسك 

 وشوف بنفسك إزاي مع الوقت، هتلاقي الشغف بيرجع ينور جواك وحدة وحدة، لحد ما تحس إنك رجعت للحياة بكل حواسك.

لازم تكون لطيف مع نفسك، تحترم إيقاعك الخاص، وما تضغطش عليها وتزيد سرعة ... ابدأ بخطوة واحدة بسيطة ...

ايه أول خطوة هتاخدها من المقالة دي؟

شاركنا في التعليقات! ✨

كتابة: 𝓑𝓜𝓓

لو دي أول مرة ليك معانا في رحلة صحوة الشغف، انصحك تقرأ

 محطتنا الأولى 

• صحّي شغفك اللي نام: جِه الوقت نبدأ من تاني
  

ثم محطتنا الثانية 

• ليه شغفك بينام؟ الأسباب اللي بتخلي الحماس يطفي فجأة!
  

واستنى نكمل رحلتنا سوا، وتصحي شغفنا