حوار مع الفنان محمد جمال فاروق: "الرسم دعوة للجمال والتأمل"

مين هو محمد جمال فاروق؟

أنا محمد جمال فاروق، عندي ٣٩ سنة، من قرية العدوة في الفيوم. فنان تشكيلي، والرسم جزء كبير جدًا من كياني، مش بس هواية. بحب أعبّر بيه عن مشاعري وعن الجمال اللي حوالينا. مؤمن إننا كلنا فنانين بشكل أو بآخر، لأن الفن مش بس رسم، الأدب فن، والطب والهندسة فن، وكل حاجة في حياتنا ممكن نتذوق فيها الفن.

احكيلنا حكايتك مع الرسم؟

بَرسم من وأنا صغير، وكان عندي شغف كبير بالتجريب والتلوين. أول مرة أجرّب أرسم بورتريه كانت تجربة فارقة، النتيجة كانت مش بطالة خالص بالنسبة لأول مرة، وساعتها التشجيع من أهلي فرق جدًا، وكملت. لما دخلت كلية التجارة، حسيت إني دخلت عالم مختلف، بس بعد ما خلصت، عملت دبلومة دراسات حرة في كلية الفنون الجميلة، وهناك اتفتحلي أفق جديد تمامًا.

إيه تقصد لما قلت "اتفتحلي أفق جديد"؟

يعني في كلية فنون جميلة، حسيت إني ببدأ أشوف الدنيا بنظرة مختلفة، بعيون الفنان. عرفت يعني إيه مدارس فنية، وتاريخ الفن، وبدأت أفهم الفن بشكل أكاديمي. وكل مرة أتعلم حاجة، ألاقي نفسي قدّام أفق تاني. زي ما تقول دعوة للتعلم والتأمل.

إيه أكتر حاجة بتحب ترسمها؟

بحب جدًا الرسم اللايف، سواء أشخاص أو مناظر طبيعية "لاند سكيب"، فيه متعة خاصة وأنا برسم، بغض النظر عن النتيجة. وكمان بحب اللحظات اللي بكون فيها قدام لوحة فاضية وألوان، وقلبي مليان مشاعر، ساعتها اللوحة اللي بتطلع بتكون غالية عليا جدًا.

في مود معين بتحب ترسم فيه؟

أيوه، الحالة النفسية بتفرق، بس ماينفعش أستنى المود، لأن ده ممكن يخلي الواحد يكسل. أوقات بجبر نفسي أرسم حتى لو شخبطة، كتمرين. بس طبعًا لو كنت في الحالة الصح، بتفرق. القهوة، الجيم، والمزيكا ساعات بيساعدوني أدخل المود.

إيه هو المرسم؟

المرسم بالنسبة لي مش بس مكان، ده كيان خاص، فيه أدواتي وقعدتي. عملت صفحة على فيسبوك بـ اسم "المرسم" من سنة 2021، وبوثّق فيها شغلي. حتى لو الركن ده في أوضة في البيت، لازم كل رسام يبقى عنده مساحة خاصة تشجعه وتبعده عن الكسل.

في رأيك الرسم موهبة أكتر ولا مهارة؟

الرسم ممكن يكون مهارة تتعلمها، بس لازم يبقى فيه شغف. التعليم مهم جدًا وبيفرق مع الشخص الموهوب. بس ده ما يمنعش إن أي حد ممكن يتعلم ويطوّر نفسه. في الآخر، اللي عايز يتعلم ويرسم، يقدر. مفيش عوائق دلوقتي، الدنيا مفتوحة والعلم في كل حتة.

مين أو إيه مصدر إلهامك؟

الناس البسيطة، الأطفال، الشارع المصري وروح رمضان. صوت طبلة المسحراتي مثلًا فيه جمال بيحرّك المشاعر.

مين الفنان اللي بتحب شغله وليه؟

كتير جدًا، بس بيكاسو ليه معزة خاصة عندي. لأنه قدر يغيّر مفاهيم كتير عن فكرة الرسم الواقعي. وعارفين إن له لوحات واقعية بدقة عالية من هو عنده ١٤ سنة! بس الناس مش دايمًا بتشوف غير لوحاته التكعيبية.

إيه أكتر تعليق أثّر فيك؟

فاكر كويس في الإعدادية، لما والدي شاف أول رسمة بورتريه ليا، كان مبسوط جدًا. بعدين قابلت رسام قريتنا الأستاذ جمال قطب، وكنت متوتر جدًا، وخايف أغلط. قاللي وقتها: "متخافش"، الكلمة دي فضلت معايا لحد دلوقتي. فهمت بعدين إن الخوف فعلًا مقبرة كل جميل فينا. وأمانة، مش فاكر تعليق سلبي أثر فيا، يمكن لأني كنت مركز على اللي بيشجعني.

واجهتك مشاكل في طريقك كفنان؟

طبعًا، مفيش حد ما بيقابلش تحديات، خصوصًا في البداية. بس كلها بتعدي بالصبر والثقة والمثابرة.

الرسم غيّر إيه في شخصيتك؟

الرسم خلاني أبص للدنيا بألوان، بجد. بقيت أشوف الناس زي الألوان، كل لون ليه دور ومكان في اللوحة، وكل شخص ليه قيمة وتأثير في حياتنا. بقالي رغبة دايمًا إني أكون شخص أفضل، مع إني ساعات بكسل وبلوم نفسي، بس بحاول أشتغل على نفسي أكتر وأكتر.

إيه النصيحة اللي تقولها لحد عايز يبدأ يرسم أو يرجع بعد ما فقد الشغف؟

النصيحة دي لنفسي كمان، لو جواك طاقة، استغلها صح. ارسم، حتى لو مش لاقي موضوع، ارسم مشاعرك، ارسم زي ما بتحس. صدّقني أول ما تبدأ، هتفتحلك أبواب كتير، وهتشوف نفسك والعالم بشكل جديد. المهم إنك تبدأ، وبصدق.

"في نهاية كلامه، بيأكد محمد جمال إن الفن مش بس ألوان وخطوط، ده أسلوب حياة ونظرة مختلفة للعالم. ولو جواك شغف، حتى لو بسيط، خده على محمل الجد، لأن كل بداية صغيرة ممكن تفتحلك باب كبير للجمال والإبداع. 

تابعوا أعماله على صفحة "المرسم" واكتشفوا المزيد من إبداعاته الفنية!"

https://www.facebook.com/AlMarsm.Official

كتابة:BMD 

لو مهتم بالرسم ف انصحك تقرأ حوارنا مع هيفين 

حوار مميز مع الرسامة الكردية "هيفين محمد علي" ومواجهة الظروف والتحديات