7 خطوات لزيادة الثقة بالنفس للبنات والتخلص من المقارنات والتنمر
 |
في بعض البنات ثقتها بنفسها بتضعف لأسباب كتيرة منها، التنمر، معايير الجمال اللي اخترعها المجتمع بتاعنا وصدقها، المقارنات الظالمة اللي بتحطي نفسك فيها مع أي واحده أو حد يحطك فيها و أولهم أهلك، وطبعا كل ده بيأذيكي نفسيا وبيقلل ثقتك بنفسك، وبيخليكي تربطي ثقتك بنفسك بالحاجات اللي بتقدميها أو بتقدري تعمليها أو صفاتك الشخصية أو الشكلية، متعرفيش إنك كده بتهدي كل حاجة حلوة جواكي وبتكوني هشة جدا وكلمة توديكي وكلمة تجيبك، وعشان كده هديكي كام نصيحة والفت انتباهك لكام نقطة أنتِ غافلة عنها تزودي بيهم ثقتك فى نفسك.
1- متربطيش ثقتك بنفسك بقدراتك :
أنتِ مميزة زي ما أنتِ عشانك أنتِ مش عشان بتقدمي أي حاجة لحد، لازم تعرفي قيمتك الشخصية وترفعي استحقاقيتك، قولي لنفسك أنا استاهل كل حاجة حلوة عشان أنا رحمة مش عشان بعرف أعمل كونتانت أو بساعد فلان أو شاطرة في الطبخ أو الرسم لا أنا استاهل عشان أنا رحمة بس سادة بدون إضافات.
2- اوعي تقارني نفسك ب أي حد غيرك:
غلط جدا تقارني نفسك بأي حد، لأن ظروفك غير ظروف غيرك، حياتك غيره صفاتك غيره قدرتك على التحمل غيره تفكيرك غيره وإلى آخره .. المقارنة دي مش هتعمل حاجة غير إنها تهد ثقتك بنفسك وتحسسك إنك دايما متأخرة أو دايما مقصرة فى حاجة، الأفضل تقارني نفسك بين زمان ودلوقتي وتشجعي نفسك إنك عديتي بتجارب قاسية واتعلمتي منها، خليكي دايما مركزة مع نفسك وشجعيها دايما على الاستمرار والتطور والنجاح.
3- أهتمي بمظهرك الخارجي :
طول م أنتِ مهتمة بشكلك وبأبسط تفاصيلك ثقتك فى نفسك هتزيد، دي مش سطحية خالص بالعكس الناس طبيعي أول انطباع بتاخده عنك بيكون من مظهرك ولغة جسدك ، لما تهتمي بشكلك ونظافتك الشخصية وتنسقي لبسك و ألوانه هينعكس على ثقتك بنفسك وبالتالي على لغة جسدك ، وبكده هتقدري تعكسيها للناس بصورة طبيعية من غير اصطناع .
4- اوعي اوعي تجلدي نفسك :
تخيلي نفسك دي طفلة قدامك وبتتكلمي معاها، هل هترضي حد يقول الكلام القاسي ده للطفلة الكتكوتة البريئة دي ويجرحها؟! أكيد لا، وكمان عقلك الباطن مش بيفهم ولا بيصدق غير الكلام اللي بتقوليه، لو قولتي لنفسك أنتِ شاطرة وناجحة وهتقدري تعدي، اللاوعي عندك هيترجم ده لأفعال وهيصدقه، في مقولة سمعتها من دكتور الصحة النفسية أثناء المحاضرة في الدبلومة العامة قال اصطنعي الحاجة لحد ما تبقى عندك، اصطنعي الصفة الحلوة لحد ما تبقى حقيقية، وفي مقولة أخرى " faked your maked".
5- اتعلمي مهارة جديدة :
في بعض الأحيان لمرضى الإدمان عشان يزودوا ثقتهم بنفسهم ويرفعوا طاقتهم الإيجابية بيتعلموهم مهارة جديدة، زي مثلا الطفل الصغير أول ما بيتعلم حاجة جديدة بتزود ثقته في نفسه وبيحاول يظهرها للناس كلها وبيبقى طاير من الفرحة، بيمشوا معاه بنفس الكونسبت، ممكن الطريقة دي تنفع مع بعض الأشخاص، بس طبعا خليكي واثقة إن ثقتك بنفسك دي ليكي أنتِ عشان أنتِ مميزة زي مأنتِ، فكرة تعلم المهارة الجديدة عامل مساعد بس لكن أنتِ الأساس.
6- لا تدع جهل الناس بك يغلب علمك بنفسك :
المقولة دي لسيدنا علي ابن أبي طالب رضي الله عنه، أحب أزودها على المقال لأني مؤمنة بيها جدا، متاخديش نصيحة أو كلام من حد ميعرفكيش كويس على إنه صح وحقيقي، محدش هيعرفك صح أكتر من نفسك، ولو فكرتي تاخدي نصيحة من حد يكون أقرب حد ليكي وبتثقي فى رأيه، أوقات بنحتاج حد برانا يعمل سبوت لايت على صفات فينا منعرفهاش، بس الأهم تعرفي مين اللي تسأليه، والكلام ينطبق برضو على الناس اللي بتحاول تهد ثقتك بنفسك بدافع الغيرة أو هذا ما وجدنا عليه ابائنا، لو حد نفسيته مريضة هز ثقتك بنفسك أتأكدي إنه شايف نفسه هو كده وبيلزقها فيكي أنتِ عشان يبعد عنه الشك.
7- أشتغلي على نسختك الي بتتمنيها :
مين فينا مش بتكون نفسها توصل لمستوى معين وحياة معينة ولايف استايل مختلف عن اللي عايشاه، بس الفرق أن الشخص الواثق في نفسه بيشتغل على نفسه وبيحبها لدرجة إنه عاوزها أحسن حد، هاتي ورقة وقلم وأكتبي أنتِ نفسك تكوني عاملة ازاي وعايشة ازاي بعد سنتين من دلوقتي، مثلا نفسك تشتغلي في وظيفة معينة وعندك عربية نوعك المفضل أو نفسك تغيري عاداتك وتصحي 5 الصبح وتوصلي لجسم معين لازم تعملي خطة لكل ده، حطي خطوات ثابتة ومعروفة تقدري تمشي عليها وتحققيها، وتابعي نفسك أول بأول ولو حاجة باظت عادي جدا غيري الخطة المهم توصلي للنسخة اللي بتتمنيها من نفسك.
فى نهاية المقال أحب ألفت انتباهك بأهم نقطة اتكلمت عنها وهي إنك مميزة زي مأنتِ مش بشكلك ولا شخصيتك ولا مهاراتك، أنتِ مميزة عشان أنتِ كده واتولدتي كده بكل تجاربك وعثراتك ووقعاتك ونجاحاتك البسيطة قبل الكبيرة مميزة سادة بدون أي إضافات، وأهم شرط لازم توصليله عشان تثقي في نفسك هو إنك تحبيها وتحترميها وتقدريها متستنيش من حد غيرك يعمل ده عشان مهما عمل هتفضل ثقتك في نفسك ضعيفة لأنها محتاجة كل ده منك أنتِ قبل أي حد تاني.
ومتنسوش تبعتولي انستا لو احتاجتوا أي مساعدة وأتمنى تكونوا استفادتوا من المقال ومستنية رأيكم وتعليقاتم .
لو المقال ده لمسكِ أو حسّيتي إنه مفيد ليكي، شاركيه مع صاحبتك اللي محتاجة الكلام ده دلوقتي.
ومتنسيش تقرأي كمان:
[7 صفات نعرف بيهم الأنثى الغير مكتملة الأنوثة]
[10 صفات للأنثى المكتملة وازاي ترفعي طاقتك الأنثوية]
وعلشان تفضلي متوصلة بمحتوى بيدعمك ويفكرك دايمًا إنك مميزة زي ما إنتِ، تابعي صفحتنا على:
كتابة: رحمة عبد العليم
تعليقات
إرسال تعليق
متنساش تشاركنا برأيك